വിടാതെ പിടികൂടി ചൈന; പിന്നെയും കൂപ്പുകുത്തി ബിറ്റ്​കോയിൻ

ബെയ്​ജിങ്​: ​ലോകത്തിന്‍റെ വരുംകാല നാണയമായി അവതരിപ്പിക്കപ്പെട്ട്​ എത്തിയ ക്രിപ്​റ്റോകറൻസിയായ ബിറ്റ്​കോയിന്‍റെ മൂല്യം കൂപ്പുകുത്തൽ തുടരുന്നു. ആറു ദിവസത്തിനിടെ 20 ശതമാനമാണ്​ ബിറ്റ്​കോയിന്​​ മൂല്യമിടിഞ്ഞത്​. ക്രിപ​്​റ്റോകറൻസികൾക്കെതിരെ ചൈന തുടരുന്ന കടുത്ത നടപടികളാണ്​ ശനിദശ സൃഷ്​ടിച്ചതെന്നാണ്​ സൂചന. കഴിഞ്ഞ ഏപ്രിലിൽ 65,000 ഡോളർ മൂല്യമുണ്ടായിരുന്ന ബിറ്റ്​കോയിൻ തിങ്കളാഴ്ച ആഗോള വിപണിയിൽ 31,333 ഡോളറായാണ്​ ഇടിഞ്ഞത്​.

ബിറ്റ്​കോയിന്​ ചൈന അടുത്തിടെ കർശന നിയന്ത്രണമേർപെടുത്തിയിരുന്നു. പുതുതായി സ്വന്തം ക്രിപ്​റ്റോകറൻസി അവതരിപ്പിക്കുന്നതിന്‍റെ ഭാഗമായാണ്​ ബിറ്റ്​കോയിൻ ഉൾപെടെ നിലവിലുള്ളവക്കു മേൽ നടപടിയെന്ന വിമർശനം ഉയർന്നിട്ടുണ്ട്​. ആഗോള ബിറ്റ്​കോയിൻ രൂപകൽപന ഏറ്റവും കൂടുതൽ നടക്കുന്ന രാജ്യമാണ്​ ചൈന- ആഗോള ഉൽപാദനത്തിന്‍റെ 65 ശതമാന​ത്തോളം. ഇവക്കു മേൽ നിയന്ത്രണം വരുത്തുന്നത്​ സ്വാഭാവികമായും മൂല്യമിടിയാൻ കാരണമാകും.

ബിറ്റ്​കോയിൻ പിറകോട്ടുപോയതോടെ മറ്റുള്ളവക്കും മൂല്യം കുത്തനെ ഇടിഞ്ഞിട്ടുണ്ട്​.