കാബൂളിൽനിന്ന്​ പുറപ്പെട്ട യു.എസ്​ വിമാനത്തിന്‍റെ ലാന്‍റിങ്​ ഗിയറിനരികെ കുടുങ്ങിക്കിടന്ന്​ മൃതദേഹാവശിഷ്​ടങ്ങൾ

വാഷിങ്​ടൺ: താലിബാൻ അധികാരം പിടിച്ച കാബൂൾ നഗരത്തിലെ ഹാമിദ്​ കർസായി വിമാനത്താവളത്തിൽനിന്ന്​ പറന്നുയർന്ന യു.എസ്​ വിമാനത്തിന്‍റെ ലാന്‍റിങ്​ ഗിയറിനോടു ചേർന്ന്​ മൃതദേഹാവശിഷ്​ടങ്ങൾ കണ്ടെത്തിയത്​ സ്​ഥിരീകരിച്ച്​ യു.എസ്​ വ്യോമസേന. തിങ്കളാഴ്ച സർവീസ്​ നടത്തിയ സൈനിക വിമാനത്തിലാണ്​ ഹൃദയം നുറുക്കുന്ന കാഴ്ച. വിമാനം ഇറങ്ങിയ ഉടൻ ആളുകൾ തള്ളിക്കയറിയതോടെ അതിവേഗം തിരിച്ചുപറക്കുകയായിരുന്നുവെന്നും പരിശോധനക്ക്​ കഴി​ഞ്ഞില്ലെന്നുമാണ്​ വിശദീകരണം.

താലിബാൻ ഭരണത്തിൽനിന്ന്​ രക്ഷപ്പെടാൻ വിമാനത്തിന്‍റെ ലാൻറിങ്​ ഗിയറിൽ കയറിക്കൂടിയതാകാം ഇവരെന്നാണ്​ നിഗമനം. വിമാനത്തിന്‍റെ ചിറകുകളിൽ അള്ളിപ്പിടിച്ചുകിടന്നവർ പറന്നുയർന്ന ഉടൻ താഴോട്ടുവീണ്​ മരിച്ച സംഭവവും റിപ്പോർട്ട്​ ചെയ്​തിരുന്നു.

എങ്ങനെയും രാജ്യത്തുനിന്ന്​ രക്ഷപ്പെടാൻ ജനം തിരക്കുകൂട്ടുന്ന കാഴ്ചകൾ പങ്കുവെക്കുന്ന നിരവധി ​വിഡ​ിയോകളാണ്​ കഴിഞ്ഞ ദിവസങ്ങളിൽ പുറത്തുവന്നിരുന്നത്​. വിമാനത്തിൽനിന്ന്​ വീണ്​ നിരവധി പേർ മരിച്ചതും റിപ്പോർട്ട്​ ചെയ്യപ്പെട്ടു. അതിനിടെയാണ്​ മൃതദേഹാവശിഷ്​ടങ്ങൾ കണ്ടെത്തുന്നത്​.

അമേരിക്കൻ സൈനിക വിമാനങ്ങൾ ഇതുവരെയായി 3,200 ഓളം പേരെ ഒഴിപ്പിച്ചതായാണ്​ അധികൃതർ പറയുന്നത്​. ഞായറാഴ്ച രാത്രി സി-17 വിമാനം കാബൂളിൽനിന്ന്​ ഉയർന്നത്​ 640 പേരെയുമായിട്ടായിരുന്നു. വിമാനത്തിൽ കയറ്റാവുന്നതിന്‍റെ ഇരട്ടിയിലേറെ പേർ. കയറിയവരെ ഇറക്കാൻ നിൽക്കുന്നതിന്​ പകരം ഇവരെയുമായി പറക്കാനായിരുന്നു പൈലറ്റുമാരുടെ തീരുമാനം. പിറ്റേന്നും സമാനമായി ആൾക്കൂട്ടം വിമാനത്തിൽ കയറിപ്പറ്റിയപ്പോൾ സൈനികരെ വിന്യസിച്ചും മുകളിൽ അപ്പാഷെ ഹെലികോപ്​റ്റർ വഴിയും ഇവരെ പരമാവധി ഇറക്കിയ ശേഷം പറന്നുയരുകയായിരുന്നു.

ഉയരു​േമ്പാൾ ലാന്‍റിങ്​ ഗിയർ ഉയർത്താൻ ശ്രമിച്ചപ്പോഴാണ്​ നിരവധി പേർ അകത്തുകയറിപ്പറ്റി ചക്രത്തിലമർന്നുമരിച്ചതായി കണ്ടെത്തിയത്​. നാലു മണിക്കൂർ കഴിഞ്ഞ്​ വിമാനം ഖത്തറിലെ ഉദൈദ്​ താവളത്തിൽ ഇറക്കി. എത്ര പേർ ഇങ്ങനെ മരിച്ചിട്ടുണ്ടെന്ന്​ അധികൃതർ പുറത്തുവിട്ടിട്ടില്ല. അഫ്​ഗാനിൽനിന്ന്​ നാടുവിടുന്ന അഫ്​ഗാനികളെയും മറ്റുള്ളവരെയും അമേരിക്കൻ താവളമായ ഉദൈദിലേക്കാണ്​ കൊണ്ടുവരുന്നത്​.