ആഡംബര നൗക കടലിൽ മുങ്ങി; കാണാതായവരിൽ ബ്രിട്ടീഷ് വ്യവസായിയും
text_fieldsസിസിലി (ഇറ്റലി): തെക്കൻ ഇറ്റലിയിലെ സിസിലി ദ്വീപിൽ കൊടുങ്കാറ്റിനെതുടർന്ന് ആഡംബര നൗക കടലിൽ മുങ്ങി. ബ്രിട്ടീഷ് ടെക് വ്യവസായി മൈക് ലിഞ്ച് ഉള്പ്പെടെ ആറുപേരെ കാണാതായി.
തിങ്കളാഴ്ച രാവിലെ നാലിന് മെഡിറ്ററേനിയൻ ദ്വീപിന്റെ തീരത്തുനിന്ന് 700 മീറ്റർ അകലെ പലേർമോയുടെ കിഴക്ക് പോർട്ടിസെല്ലോ തുറമുഖത്തിന് സമീപമായിരുന്നു അപകടം. തുറമുഖത്ത് നങ്കൂരമിട്ട 56 മീറ്റർ നീളമുള്ള ‘ദി ബയേസിയൻ’ നൗക തീരത്തേക്ക് കടൽ ആഞ്ഞടിച്ചതോടെ കാറ്റിനും മഴക്കും ഇടയിൽപെട്ട് മുങ്ങുകയായിരുന്നു. 10 ജീവനക്കാരും 12 യാത്രക്കാരുമടക്കം 22 പേരാണ് നൗകയിലുണ്ടായിരുന്നത്. ഒരു വയസ്സുകാരിയായ ബ്രിട്ടീഷ് പെൺകുട്ടി ഉൾപ്പെടെ 15 പേരെ രക്ഷപ്പെടുത്തി. കപ്പലിലെ പാചകക്കാരന്റെ മൃതദേഹം കണ്ടെത്തിയിട്ടുണ്ട്.
കാണാതായവരിൽ ആഗോള ബാങ്കിങ് സ്ഥാപനമായ മോർഗൻ സ്റ്റാൻലി ഇൻറർനാഷണലിന്റെ ചെയർമാൻ ജോനാഥൻ ബ്ലൂമറെ കൂടാതെ മൈക്ക് ലിഞ്ചിന്റെ മകൾ ഹന്നയും ഉൾപ്പെടും. 50 മീറ്റർ കടലിനടിയിൽ കിടക്കുന്ന നൗകയിലുള്ളവർക്കായി മുങ്ങൽ വിദഗ്ധരുടെ നേതൃത്വത്തിൽ തിരച്ചിൽ നടത്തിവരികയാണ്. 11 ബില്യൻ ഡോളർ തട്ടിപ്പിൽ അമേരിക്ക കുറ്റവിമുക്തനാക്കിയ ഓട്ടോണമി കോർപറേഷന്റെ സ്ഥാപകനാണ് 59 വയസ്സുള്ള മൈക്ക് ലിഞ്ച്.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.