കാബൂൾ വിമാനത്താവളത്തിൽ ഏഴുപേർ കൊല്ലപ്പെട്ടെന്ന് ബ്രിട്ടീഷ്​ സൈന്യം; വിമാന സർവിസ്​ നിർത്തി പാകിസ്​താൻ

കാബൂൾ: രാജ്യം വിടാൻ നൂറുകണക്കിന്​ ആളുകൾ കാത്തിരിക്കുന്ന കാബൂൾ വിമാനത്താവളത്തിൽ തിക്കിലും തിരക്കിലുംപെട്ട്​ ​ഇതുവരെ ഏഴുപേർ കൊല്ലപ്പെട്ടതായി ബ്രിട്ടീഷ്​ സൈന്യം അറിയിച്ചു​. എന്നാൽ, കുടിയൊഴിപ്പിക്കൽ തുടങ്ങിയതിന്​ ശേഷം ഒരാഴ്​ചക്കിടെ കാബൂൾ വിമാനത്താവളത്തിന്​ സമീപം 20 പേർ മരിച്ചതായാണ് നാറ്റോ അറിയിച്ചത്.

യു.എസ്​ സേന നിയന്ത്രണത്തിലുള്ള വിമാനത്താവളത്തിന്​ ചുറ്റും താലിബാൻ സേന നിലയുറപ്പിച്ചിട്ടുണ്ട്​. തിരക്ക്​ നിയന്ത്രിക്കാൻ താലിബാൻ സൈന്യം ആകാശത്തേക്ക്​ വെടിവെക്കുന്നതായി റിപ്പോർട്ടുണ്ട്​. തങ്ങളുടെ നിർദേശപ്രകാരമല്ലാതെ കാബൂൾ വിമാനത്താവളം വഴി യാത്ര പാടില്ലെന്ന്​ അമേരിക്ക, പൗരന്മാർക്ക്​ മുന്നറിയിപ്പ്​ നൽകി. അഫ്​ഗാനിൽനിന്ന്​ സൈന്യം കുടിയൊഴിപ്പിച്ചവരെ സ്വന്തം രാജ്യങ്ങളിലെത്തിക്കാൻ യു.എസ്​ പ്രതിരോധ വകുപ്പ്​ വിമാന കമ്പനികളുടെ സഹായം തേടി.

അതേസമയം, വിമാനത്താവളത്തിലെ അരാജകത്വത്തിന്​ കാരണം അമേരിക്കൻ സേനയാണെന്ന്​ താലിബാൻ കുറ്റപ്പെടുത്തി. കാബൂളിലെ ഇന്ത്യൻ പൗരന്മാർ സുരക്ഷിതരാണെന്നും ഇവരുടെ േരഖകൾ പരിശോധിക്കുകയാണെന്നും അഫ്​ഗാൻ മാധ്യമങ്ങൾ റിപ്പോർട്ട്​ ചെയ്​തു.

കാബൂൾ വിമാനത്താവളത്തിൽനിന്നുള്ള വിമാന സർവിസ്​ താൽക്കാലികമായി നിർത്തിവെച്ചതായി പാകിസ്​താൻ അറിയിച്ചു. പാക്​ സർക്കാർ നിയന്ത്രണത്തിലുള്ള പാകിസ്​താൻ ഇൻറർനാഷനൽ എയർലൈൻസ്​ മാത്രമാണ് കുറച്ചുദിവസങ്ങളായി​ ഇവിടെനിന്ന്​ വാണിജ്യ സർവിസ്​ നടത്തിയിരുന്നത്​. അടിസ്​ഥാന സൗകര്യമില്ലാത്തതിനാലാണ്​ സർവിസ്​ നിർത്തിയത്​. താലിബാൻ കാബൂൾ പിടിച്ചശേഷം വിമാനത്താവള ജീവനക്കാർ ജോലി ചെയ്യുന്നില്ലെന്നും റൺവേയിൽ കെട്ടിക്കിടക്കുന്ന മാലിന്യം അപകടത്തിന്​ ഇടയാക്കുമെന്നും​ ആശങ്കയുണ്ട്​.