സിഖുകാർക്കെതിരായ ആക്രമണങ്ങളിൽ അമിത് ഷാക്ക് പങ്ക്; വാഷിങ്ടൺ പോസ്റ്റിനോട് വെളിപ്പെടുത്തി കനേഡിയൻ മന്ത്രി

ന്യൂഡൽഹി: സിഖുകാർക്കെതിരായ ആക്രമണങ്ങളിൽ കേന്ദ്ര ആഭ്യന്തരമന്ത്രി അമിത് ഷാക്ക് പങ്കുണ്ടെന്ന വെളിപ്പെടുത്തൽ. വാഷിങ്ടൺ പോസ്റ്റിനോടാണ് കനേഡിയൻ മന്ത്രി ഇക്കാര്യം പറഞ്ഞത്. കനേഡിയൻ മണ്ണിൽ നടക്കുന്ന സിഖുകാർക്കെതിരായ ആക്രമണങ്ങളിൽ അമിത് ഷാക്ക് പങ്കുണ്ടെന്നാണ് വെളിപ്പെടുത്തൽ. ഡേവിഡ് മോറസണെന്ന മ​ന്ത്രിയാണ് വെളിപ്പെടുത്തൽ നടത്തിയിരിക്കുന്നത്. ഇതിന് മുമ്പ് കനേഡിയൻ ഉദ്യോഗസ്ഥരും വാഷിങ്ടൺ പോസ്റ്റിനോട് ഇതുമായി ബന്ധപ്പെട്ട് വെളിപ്പെടുത്തൽ നടത്തിയിരുന്നു.

ഹർദീപ് സിങ് നിജ്ജാറിന്റെ വധത്തിൽ ഇന്ത്യൻ സർക്കാറിന്റെ ഏജന്റുമാർക്ക് പ​ങ്കുണ്ടെന്ന് കാനഡ ആരോപിക്കുന്നതിനും മുമ്പ് വിവരങ്ങൾ വാഷിങ്ടൺ പോസ്റ്റിന് ചോർത്തി നൽകിയെന്ന റിപ്പോർട്ടുകൾ പുറത്ത് വന്നിരുന്നു. ഇതുസംബന്ധിച്ച് ട്രൂഡോയുടെ ഉപദേശകയും വെളിപ്പെടുത്തൽ നടത്തിയിരുന്നു. ഉപദേശക നതാലെ ഡ്രോവിൻ കനേഡിയൻ പാർലമെന്ററി സമിതിക്ക് മുമ്പാകെ ഇക്കാര്യം വെളിപ്പെടുത്തിയെന്നാണ് ദ ഗ്ലോബ് ആൻഡ് മെയിൽ ന്യൂസ്​പേപ്പർ റിപ്പോർട്ട് ചെയ്തത്. ഇത്തരം വിവരങ്ങൾ ചോർത്തി നൽകാൻ തനിക്ക് പ്രധാനമന്ത്രിയുടെ അനുമതി വേണ്ടെന്നും അവർ വെളിപ്പെടുത്തിയെന്നാണ് റിപ്പോർട്ട്.

ഇന്ത്യയുമായി സഹകരിക്കാൻ സ്വീകരിച്ച നടപടികളെ കുറിച്ച് തരംതിരിക്കാത്ത വിവരങ്ങൾ നൽകി. കനേഡിയൻ പൗരൻമാർക്കെതിരെ ഇന്ത്യ ഏജന്റുമാർ സ്വീകരിച്ച നടപടികളെ കുറിച്ചുള്ള വിവരങ്ങളും നൽകിയെന്നും നതാലെ ഡ്രോവിൻ പാർലമെന്ററി സമിതിക്ക് മുമ്പാകെ വെളിപ്പെടുത്തിയെന്നാണ് കനേഡിയൻ മാധ്യമങ്ങൾ റിപ്പോർട്ട് ചെയ്യുന്നത്. ഒക്ടോബർ 13ന് മുമ്പ് തന്നെ ഇത്തരം വിവരങ്ങൾ നൽകിയെന്നും റിപ്പോർട്ടുണ്ട്.

ഒക്ടോബർ 14ാം തീയതി ആറ് കനേഡിയൻ നയതന്ത്ര ഉദ്യോഗസ്ഥരെ ഇന്ത്യ പുറത്താക്കിയിരുന്നു. തുടർന്ന് ഇന്ത്യൻ ഉദ്യോഗസ്ഥർക്കെതിരെ കാനഡയും നടപടിയെടുത്തിരുന്നു. നിജ്ജാർ വധം ഇരു രാജ്യങ്ങളും തമ്മിലുള്ള ബന്ധം വഷളാവുന്നതിനും ഇടയാക്കിയിരുന്നുവെന്ന് റിപ്പോർട്ടുണ്ട്.