ഇന്ത്യക്കുള്ള സഹായം വർധിപ്പിക്കണ​മെന്ന്​ കനേഡിയൻ സെനറ്റർമാർ

വാഷിങ്​ടൺ: കോവിഡി​െൻറ രണ്ടാം തരംഗത്തിൽ വലയുന്ന ഇന്ത്യക്കുള്ള സഹായം വർധിപ്പിക്കണമെന്ന്​ ആവശ്യപ്പെട്ട്​ കനേഡിയൻ സെനറ്റർമാർ. വാക്​സിനുള്ള പേറ്റൻറ്​ താൽക്കാലികമായി ഒഴിവാക്കണമെന്ന്​ ട്രൂഡോ സർക്കാറിനോട്​ അവർ ആവശ്യപ്പെട്ടു. ഇത്​ പ്രതിസന്ധിയിലായ ഇന്ത്യ​യെ സഹായിക്കുമെന്നും സെനറ്റർമാർ പറഞ്ഞു.

ഇന്തോ-കനേഡിയൻ സെനറ്ററായ രത്​ന ഒമിഡവാറാണ്​ ഇതുമായി ബന്ധപ്പെട്ട പ്രമേയം കൊണ്ട്​ വന്നത്​. ഇതിന്​ ആറ്​ സെനറ്റർമാർ പിന്താങ്ങുകയായിരുന്നു. കടുത്ത പ്രതിസന്ധിയാണ്​ ഇന്ത്യ അനുഭവിക്കുന്നത്​. അവർക്ക്​ സാധ്യമായ സഹായങ്ങളെല്ലാം കാനഡ ചെയ്യണമെന്ന്​ സെനറ്റർ ​ലിയോ ഹോസാകോസ്​ പറഞ്ഞു.

പ്രമേയത്തെ അനുകൂലിക്കുന്ന സെനറ്റർമാർ ഇക്കാര്യം ആവശ്യപ്പെട്ട്​ പ്രധാനമന്ത്രി ജസ്​റ്റിൻ ട്രുഡോക്ക്​ കത്തയക്കുകയും ചെയ്​തിട്ടുണ്ട്​. കാനഡക്ക്​ ഇന്ത്യ വാക്​സിൻ നൽകിയിരുന്നു. ആ സഹായം തിരികെ നൽകാനുള്ള അവസരമാണിതെന്ന്​ സെനറ്റർ രത്​ന ഒമിഡവാർ പറഞ്ഞു. ഇതുകൂടാതെ ഇന്ത്യക്കും ദക്ഷിണാഫ്രിക്കക്കും സഹായം നൽകണമെന്ന്​ ആവശ്യപ്പെട്ട്​ 14 സെനറ്റർമാരും പ്രധാനമന്ത്രിക്ക്​ കത്തയച്ചിട്ടുണ്ട്​.