ചൈനയിൽ കുരങ്ങുകളിൽനിന്ന്​ പടരുന്ന മങ്കി ബി വൈറസ്; ഒരു മരണം സ്​ഥിരീകരിച്ചു

ബെയ്​ജിങ്​: ലോകം കോവിഡ്​ 19ന്‍റെ പിടിയിൽ ഞെരുങ്ങു​േമ്പാൾ ചൈനയിൽനിന്ന്​ പുറത്തുവരുന്നത്​ പുതിയ വൈറസ്​ ബാധയുടെ റിപ്പോർട്ടുകൾ. ചൈനയിൽ മങ്കി ബി വൈറസ്​ സ്​ഥിരീകരിക്കുകയും ഒരു മരണം സ്​ഥിരീകരിക്കുകയും​ ചെയ്​തതായാണ്​ റിപ്പോർട്ട്​.

മൃഗങ്ങളുമായി നിരന്തരം സമ്പർക്കം പുലർത്തുന്ന വെറ്ററിനറി സർജനാണ്​ രോഗം സ്​ഥിരീകരിച്ചത്​. ​ഈ വൈറസ്​ സ്​ഥിരീകരിച്ച്​ രണ്ടു മൃഗങ്ങൾ ചത്തതിന്​ പിന്നാലെയാണ്​ മനുഷ്യരിലും കണ്ടെത്തിയത്​​. നിരവധി ആശുപത്രികളിലെ ചികിത്സക്ക്​ ശേഷം മേയ്​ മാസത്തിൽ സർജൻ മരിച്ചിരുന്നു. ഈ വർഷം മാർച്ചിലാണ്​ മങ്കി ബി വൈറസ്​ റി​പ്പോർട്ട്​ ചെയ്​തതെന്ന്​ ചൈനീസ്​ സെന്‍റർ ഫോർ ഡിസീസ്​ കൺട്രോൾ ആൻഡ്​ പ്രിവൻഷൻ അറിയിച്ചു.

രോഗിയുടെ സെറി​ബ്രോസ്​പൈനൽ ദ്രാവക പരിശോധനയിൽ സർജന്​ ആൽഫഹെർപസ്​ വൈറസ്​ ബാധ സ്​ഥിരീകരിക്കുകയായിരുന്നു. ബ്ലിസ്റ്റർ ഫ്ലൂയിഡ്​, രക്തം, മൂക്കിലെ സ്രവം, തൊണ്ടയിലെ സ്രവം, പ്ലാസ്​മ തുടങ്ങിയവ​ രോഗിയിൽനിന്ന്​ ശേഖരിച്ചിരുന്നു. സാമ്പിളുകൾ നാഷനൽ ഇൻസ്റ്റിറ്റ്യൂട്ട്​ ഫോർ വൈറൽ ഡിസീസ്​ കൺട്രോൾ ആൻഡ്​ പ്രിവൻഷനിലേക്ക്​ അയക്കുകയും അവിടെ നടത്തിയ പരിശോധനയിൽ മങ്കി ബി വൈറസ്​ കണ്ടെത്തുകയുമായിരുന്നു.

കുരങ്ങുകളിൽ പടർന്നുപിടിക്കുന്ന വൈറസാണ്​ മങ്കി ബി വൈറസ്​. മനുഷ്യരിൽ അപൂർവങ്ങളിൽ അപൂർവമായി മാത്രമാണ്​ ഈ വൈറസ്​ പടർന്നുപിടിക്കുന്നത്​. 1932ലാണ്​ ഈ വൈറസ്​ സ്​ഥിരീകരിച്ചതെന്ന്​ യു.എസ്​ സെന്‍റർ ഫോർ ഡിസീസ്​​ കൺട്രോൾ പറയുന്നു. 1932 ​ൽ രോഗം സ്​ഥരീകരിച്ച 50 പേ​രും കുരങ്ങുകളുമായി സമ്പർക്കം പുലർത്തിയിരുന്നു. കുരങ്ങൻ മാന്തുകയോ കടിക്കുകയോ ചെയ്​തവരാണ്​ ഇവർ. ഇതിൽ 21 പേർ മരണത്തിന്​ കീഴടങ്ങിയിരുന്നു.

രോഗം സ്​ഥിരീകരിച്ച ചൈനീസ്​ സർജനിൽനിന്ന്​ മറ്റുള്ളവരിലേക്ക്​ രോഗം പടർന്നെന്ന റിപ്പോർട്ടുകളില്ല. ഇദ്ദേഹവുമായി സമ്പർക്കം പുലർത്തിയവരിൽ നടത്തിയ പരിശോധനയിൽ ഫലം നെഗറ്റീവായിരുന്നു.

കൊറോണ വൈറസിനോട്​ സമാനമായ ലക്ഷണങ്ങളാണ്​ മങ്കി ബി വൈറസിനും. പകർച്ചപ്പനിക്കുണ്ടാകുന്ന ലക്ഷണങ്ങളായ പനി, കുളിര്​, സന്ധി വേദന, തളർച്ച, തലവേദന തുടങ്ങിയവയാണ്​ ഇൗ രോഗത്തിന്‍റെയും ആദ്യ ലക്ഷണങ്ങൾ. പിന്നീട്​ ശ്വാസതടസ്സം, ഛർദി, വയറുവേദന തുടങ്ങിയവയും അനുഭവപ്പെടാം.