കോവിഡ്​ ഭീതി കനക്കുന്നു; അടച്ചുപൂട്ടി ചൈനീസ്​ നഗരങ്ങൾ, വിമാന, ട്രെയിൻ സർവീസുകൾ നിർത്തി

ബെയ്​ജിങ്​: ലോകം പതിയെ സാധാരണ നിലയിലേക്ക്​ വരാനൊരുങ്ങു​േമ്പാൾ കോവിഡ്​ പ്രഭവ ഭൂമിയായ ചൈനയിൽ വീണ്ടും തീവ്രവ്യാപനം. മാസങ്ങൾക്കിടെ ഏറ്റവും കടുത്ത വ്യാപനം കണ്ട രാജ്യത്ത്​ തലസ്​ഥാനമായ ബെയ്​ജിങ്ങിലുൾപെടെ നിയന്ത്രണം കർശനമാക്കി. 25 നഗരങ്ങളിലായി 400 പേരിലാണ്​ ചൈനയിൽ കോവിഡ്​ റിപ്പോർട്ട്​ ചെയ്​തത്​. 31 പ്രവിശ്യകളിൽ 17ലും രോഗം കണ്ടെത്തി. ഡെൽറ്റ വകഭേദങ്ങളാണ്​ തിരിച്ചറിഞ്ഞത്​.

31 പ്രവിശ്യകളിലെയും പ്രാദേശിക ഭരണകൂടങ്ങൾ നിയന്ത്രണങ്ങൾ കടുപ്പിച്ചിട്ടുണ്ട്​. ആവശ്യമില്ലെങ്കിൽ വീട്ടിൽനിന്ന്​ പുറത്തുപോകരുതെന്നാണ്​ പ്രധാന നിർദേശം. വ്യാപന സാധ്യതയുള്ള 20 മേഖലകളിൽ യാത്രക്ക്​ പ്രത്യേക വിലക്കുണ്ട്​.

നാൻജിങ്​, യാങ്​സൂ പ്രവിശ്യകളിൽ ആഭ്യന്തര വിമാന സർവീസ്​ നിർത്തി.

ബെയ്​ജിങ്ങിൽ 13 റെയ്​ൽ ലൈനുകളിൽ സർവീസ്​ റദ്ദാക്കി. 23 സ്​റ്റേഷനുകളിൽ ടിക്കറ്റ്​ വിൽപന നിർത്തി.

വുഹാന്​ പുറമെ യാങ്​സു, ഷെങ്​സു എന്നിവിടങ്ങളിലും കൂട്ട പരിശോധന ആരംഭിച്ചിട്ടുണ്ട്​. ഇവിടങ്ങളിൽ പട്ടണം വിടാൻ കോവിഡ്​ നെഗറ്റീവ്​ സർട്ടിഫിക്കറ്റ്​ വേണം. ബെയ്​ജിങ്ങിലും പര​ിശോധന വ്യാപകമാക്കും.