പുതിയ വിദേശ നിക്ഷേപത്തിൽ യു.എസിനെ കടന്ന്​ ഒന്നാമത്​; ചൈന ഒന്നാം നമ്പർ സാമ്പത്തിക ശക്​തിയാകുമോ?

ബെയ്​ജിങ്​: പുതുതായുള്ള വിദേശ നിക്ഷേപത്തിൽ ലോകത്ത്​ ഒന്നാം സ്​ഥാനക്കാരായ യു.എസിനെ മറികടന്ന്​ ചൈനയുടെ മുന്നേറ്റം. ആഗോള രാഷ്​ട്രീയത്തിൽ ട്രംപ്​ കൂടുതൽ അപകടകരമായ തീരുമാനങ്ങളെടുത്ത കഴിഞ്ഞ വർഷം അമേരിക്കയിൽ വിദേശനിക്ഷേപം പകുതിയോളം കുറഞ്ഞതോടെയാണ്​ ഒന്നാം നമ്പർ പദവി ബദ്ധവൈരികളായ ചൈനക്കു മുന്നിൽ അടിയറവ്​ വെക്കേണ്ടിവന്നത്​.

കടുത്ത ഭീഷണികളും ഉപരോധങ്ങളുമായി അമേരിക്ക മുന്നിൽനിന്നു നയിച്ചിട്ടും കോവിഡ്​ കാലത്തും വലിയ പോറലേറ്റില്ലെന്ന സൂചന നൽകി കഴിഞ്ഞ വർഷം ചൈനയിലെ പുതിയ വിദേശ നിക്ഷേപം നാലു ശതമാനം വർധിച്ചിരുന്നു. ആഗോള സാമ്പത്തിക രംഗത്ത്​ ചൈനക്ക്​ കരുത്ത്​ കൂട്ടുന്നതാണ്​ യു.എൻ പുറത്തുവിട്ട പുതിയ കണക്കുകൾ.

163 ബില്യൺ ഡോളറാണ്​ കഴിഞ്ഞ വർഷം ചൈനയിലെത്തിയത്​. അമേരിക്കയിലാക​ട്ടെ 134 ബില്യൺ ഡോളറും. 2019ൽ 251 ബില്യൺ ഡോളർ അമേരിക്കയിലേക്ക്​ ഒഴികിയിടത്താണ്​ ഒറ്റ വർഷത്തിനിടെ വൻ തളർച്ചയിലേക്ക്​ അമേരിക്കയും ട്രംപും വീണത്​. ആ വർഷം ചൈനയിൽ എത്തിയിരുന്നത്​ 140 ബില്യൺ ഡോളറായിരുന്നു.

പുതിയ വിദേശ നിക്ഷേപത്തി​െൻറ കണക്കുകളിൽ ചൈനക്ക്​ മേൽക്കൈ ലഭിച്ചിട്ടുണ്ടാകാമെങ്കിലും മൊത്തം വിദേശ നിക്ഷേപത്തി​ൽ ഇപ്പോഴും മുന്നിലാണെന്നതാണ്​ അമേരിക്കക്ക്​ ആശ്വാസം.

ഏറെയായി ലോകത്തെ ഏറ്റവും വലിയ സമ്പദ്​വ്യവസ്​ഥയായി തുടരുന്ന യു.എസിനു മേൽ പതിയെ ചൈന പിടിമുറുക്കുകയാണെന്നും ഈ രംഗത്തും ഒന്നാം നമ്പർ പദവി കൈവിട്ടുപോകുമെന്നും മുന്നറിയിപ്പ്​ നൽകുന്നു സാമ്പത്തിക വിദഗ്​ധർ.

ആഗോള സാമ്പത്തിക മേഖലകളിൽ ചൈന നടത്തുന്ന കടന്നുകയറ്റത്തിൽ വിറളിപൂണ്ട​ ട്രംപ്​ ഭരണകൂടം ബെയ്​ജിങ്ങുമായി കടുത്ത വ്യാപാര യുദ്ധത്തിലാണ്​. ഇതുപക്ഷേ, തിരിച്ചടിയാകുമെന്നും 2028ഒാടെ ലോകത്തെ ഏറ്റവും വലിയ സാമ്പത്തിക ശക്​തിയായി ചൈന മാറുമെന്നും അടുത്തിടെ യു.കെ ആസ്​ഥാനമായ സെൻറർ ഫോർ എക്കണോമിക്​സ്​ ആൻറ്​ ബിസിനസ്​ റിസർച്ച്​ പുറത്തുവിട്ട റിപ്പോർട്ട്​ പറയുന്നു.

അമേരിക്കയിൽ ട്രംപ്​ അധികാരമേറിയ 2016നു ശേഷം ഓരോ വർഷവും പുതിയ വിദേശ നിക്ഷേപങ്ങൾ കുറഞ്ഞുവരികയാണ്​. 2017നു ശേഷം ഒരു വർഷവും പുതിയ നിക്ഷേപങ്ങൾ കൂടിയിട്ടില്ലെന്നാണ്​ കണക്കുകൾ. ചൈനയി​ൽ പ്രവർത്തിക്കുന്ന അമേരിക്കൻ കമ്പനികൾ അടിയന്തരമായി ചൈന വിടണമെന്നും പകരം യു.എസിൽ കമ്പനികൾ തുടങ്ങണമെന്നും ട്രംപ്​ നേരത്തെ ആവശ്യപ്പെട്ടിരുന്നു. മറിച്ച്​, അമേരിക്കയിൽ പ്രവർത്തിക്കുന്ന ചൈനീസ്​ കമ്പനികൾക്കും നിക്ഷേപകർക്കും കടുത്ത നിയന്ത്രണങ്ങളും നടപ്പാക്കാൻ നീക്കം ആരംഭിക്കുകയും ചെയ്​തു.

കോവിഡ്​ കാലത്ത്​ ആഗോള തലത്തിലെ കണക്കുകൾ പരിഗണിച്ചാൽ ആഗോള വിദേശനിക്ഷേപം 42 ശതമാനം കുറവാണെന്നാണ്​ യു.എൻ റിപ്പോർട്ട്​. ​ബ്രിട്ടനിൽ ഇത്​ 100 ശതമാന​ത്തിനടുത്താണ്​.