മരിച്ചത്​ 220 പേർ; യൂറോപിനെ മുക്കിയ ഈ മഴപ്പെയ്​ത്ത്​ മനുഷ്യനിർമിതമെന്ന്​ ഗവേഷകർ

ലണ്ടൻ: സമീപകാല ചരിത്രത്തിലെ ഏറ്റവും കനത്ത മഴയിൽ​ നിരവധി മേഖലകൾ ദിവസങ്ങളോളം പ്രളയത്തിൽ കുരുങ്ങിയത്​ യൂറോപിനുണ്ടാക്കിയ ആധി ചെറുതല്ല. ജർമനി, ബെൽജിയം തുടങ്ങിയ രാജ്യങ്ങളിൽ 220 പേരാണ്​ മരണത്തിന്​ കീഴടങ്ങിയത്​. ചില പ്രദേശങ്ങളിൽ വെള്ളം കൊണ്ടുപോയ പലരെയും കണ്ടെത്താൻ പോലുമായിട്ടില്ല. പശ്​ചിമ യൂറോപിൽ സമാന സംഭവങ്ങൾ ആവർത്തിക്കാൻ സാധ്യത ഒമ്പത്​ ഇരട്ടി കൂടുതലാണെന്നാണ്​ ഗവേഷകരുടെ പുതിയ വെളിപ്പെടുത്തൽ.

മനുഷ്യ നിർമിതമായ ആഗോള താപനം മഴപെയ്യുന്നതിന്‍റെ തോത്​ 19 ശതമാനം വരെ തീവ്രത കൂട്ടി. ജർമനിയെയും ബെൽജിയ​ത്തെയും മുൾമുനയിൽ നിർത്തിയ പ്രളയം ഇനിയും സംഭവിക്കുമെന്നതിന്‍റെ മുന്നറിയിപ്പാണെന്നും ഗവേഷകർ പറയുന്നു. പലയിടത്തും ആളുകളെയുമായി വീടുകൾ ഒന്നാകെ ഒഴുകിപ്പോകുകയായിരുന്നു. റെയിൽവേ ലൈനുകൾ തകർന്നും വൈദ്യുതി മുറിഞ്ഞും പ്രദേശങ്ങൾ ഒറ്റപ്പെട്ടു. ഒന്നുരണ്ട്​ ദിവസത്തിനിടെ ഇരച്ചെത്തിയ മഴവെള്ളമാണ്​ വൻപ്രളയമായി രൂപം പ്രാപിച്ചത്​.