ഇന്ത്യൻ വകഭേദം കുട്ടികളെ കൂടുതൽ ബാധിക്കുമെന്ന് ആശങ്ക;​ സിംഗപ്പൂരി​ൽ സ്​കൂളുകൾ അടക്കുന്നു

സിംഗപ്പൂർ: ഇന്ത്യയിൽ കണ്ടെത്തിയതുപോലുള്ള കൊറോണ വൈറസ് വകഭേദങ്ങൾ കുട്ടികളെ കൂടുതൽ ബാധിക്കുമെന്ന ആശങ്കയെ തുടർന്ന്​ സിംഗപ്പൂരിൽ ബുധനാഴ്ച മുതൽ സ്കൂളുകൾ അടക്കും. മാസങ്ങളോളം കോവിഡ്​ കേസുകൾ പൂ​ജ്യത്തിലെത്തിയെങ്കിലും പ്ര​ാദേശികമായി വീണ്ടും വ്യാപനം സ്​ഥിരീകരിച്ചതിനാൽ സർക്കാർ നിയന്ത്രണങ്ങൾ കർശനമാക്കുകയാണ്​.

പ്രൈമറി, സെക്കൻഡറി സ്കൂളുകളും ജൂനിയർ കോളജുകളും ബുധനാഴ്ച മുതൽ മേയ് 28 വരെ ഒാൺലൈൻ ക്ലാസുകളിലേക്ക്​ മാറുമെന്ന്​ അധികൃതർ അറിയിച്ചു. കഴിഞ്ഞദിവസം സിംഗപ്പൂരിൽ 38 കോവിഡ്​ കേസുകൾ സ്ഥിരീകരിച്ചിരുന്നു. ഇത് എട്ട് മാസത്തിനിടയിലെ ഏറ്റവും ഉയർന്ന പ്രതിദിന നിരക്കാണ്. ഇതിൽ ട്യൂഷൻ സെൻററിലെ ക്ലാസിൽ പ​െങ്കടുത്ത എട്ട്​ കുട്ടികളും ഉൾപ്പെടും.

'ഇന്ത്യയിൽ കണ്ടെത്തിയ ബി.1.617 വൈറസ്​ വകഭേദം കുട്ടികളെ കൂടുതൽ ബാധിക്കുന്നതായി സൂചനയുണ്ട്​. ഇത് ആശങ്കയുണ്ടാക്കുന്ന കാര്യമാണ്. അതേസമയം, രോഗബാധിതരായ കുട്ടികളുടെ നില ഗുരുതമല്ല' ^വിദ്യാഭ്യാസ മന്ത്രി ചാൻ ചുൻ സിംഗ് പറഞ്ഞു. 16 വയസ്സിന് താഴെയുള്ളവർക്ക് പ്രതിരോധ കുത്തിവെപ്പ്​ നൽകാനുള്ള പദ്ധതികളും സിംഗപ്പൂർ ആസൂത്രണം ചെയ്യുന്നുണ്ട്​.

കോവിഡ്​ കേസുകൾ വീണ്ടും റിപ്പോർട്ട്​ ചെയ്യാൻ തുടങ്ങിയതോടെ ഹോ​േങ്കാങ്ങുമായുള്ള എയർ ബബിൾ സംവിധാനവും ഇല്ലാതാകാൻ സാധ്യതയേറി​. മേയ്​ 26 മുതലാണ്​ ഇരു രാജ്യങ്ങളും തമ്മിൽ യാത്രകൾ പുനരാരംഭിക്കാൻ തീരുമാനിച്ചിരുന്നത്​.

വ്യാപനം കുറക്കുന്നതി​െൻറ ഭാഗമായി സിംഗപ്പൂരിൽ പൊതുസമ്മേളനങ്ങൾക്ക്​ നിയന്ത്രണമേർപ്പെടുത്തി. റെസ്റ്റോറൻറുകളിൽ ഭക്ഷണംകഴിക്കലും ജിമ്മുകളുടെ പ്രവർത്തനവും നിരോധിച്ചു.

അതേസമയം, കോവിഡിനെ മികച്ച രീതിയിൽ കൈകാര്യം ചെയ്​ത നാടുകളിൽ സിംഗപ്പൂർ ഇപ്പോഴും മുൻപന്തിയിൽ തന്നെയാണ്​. 5.7 ദശലക്ഷം ജനങ്ങളുള്ള ഇവിടെ ഇതുവരെ 61,000 കേസുകളും 31 മരണങ്ങളുമാണ്​ റിപ്പോർട്ട്​ ചെയ്​തത്​.