കൊറോണ ഭീതി വീണ്ടും; ബ്രിട്ടനിൽ നിന്നുള്ള വിമാനങ്ങൾ തടഞ്ഞ്​ യൂറോപ്യൻ രാജ്യങ്ങൾ

കൊറോണ ഭീതി വീണ്ടും ശക്​തമായതോടെ ബ്രിട്ടനിൽ നിന്നുള്ള വിമാനങ്ങൾ തടഞ്ഞ്​ യൂറോപ്യൻ രാജ്യങ്ങൾ. നെതർലാൻഡ്‌സ്, ബെൽജിയം എന്നീ രാജ്യങ്ങൾ യുകെയിൽ നിന്നുള്ള വിമാന സർവീസുകൾ നിരോധിച്ചു. ഫ്രാൻസും ഇറ്റലിയും ജർമ്മനിയും സമാനമായ നടപടികൾ സ്വീകരിക്കാൻ ഒരുങ്ങുന്നതായും സൂചനയുണ്ട്​. കൊറോണ വൈറസി​െൻറ പുതിയ ആഘാതം തടയുന്നതിന്​ നിരവധി യൂറോപ്യൻ രാജ്യങ്ങൾ യുകെയിൽ നിന്നുള്ള വിമാനങ്ങൾ നിരോധിക്കാൻ ആലോചിക്കുന്നതായി ബിബിസി ഞായറാഴ്​ച റിപ്പോർട്ട് ചെയ്​തു.

ബെൽജിയം യുകെയിൽ നിന്നുള്ള ട്രെയിനുകളും നിർത്തി. യുകെയിൽ നിന്നും ദക്ഷിണാഫ്രിക്കയിൽ നിന്നുമുള്ള വിമാനങ്ങൾ നിരോധിക്കുന്നത് സംബന്ധിച്ച് രാജ്യം ആലോചിക്കുന്നതായി ജർമൻ ആരോഗ്യ മന്ത്രാലയ ഉദ്യോഗസ്ഥൻ എഎഫ്‌പിയോട് പറഞ്ഞു. കുറഞ്ഞത് 24 മണിക്കൂറെങ്കിലും നിരോധനം ഏർപ്പെടുത്തുമെന്ന് ബെൽജിയം പ്രധാനമന്ത്രി അലക്​സാണ്ടർ ഡി ക്രൂ പറഞ്ഞു. ഇത് മുൻകരുതൽ നടപടിയാണെന്നും കൂടുതൽ നടപടികൾ ആവശ്യമുണ്ടെങ്കിൽ പിന്നീട് കാണുമെന്നും അദ്ദേഹം കൂട്ടിച്ചേർത്തു. യുകെയിൽ നിന്നുള്ള എല്ലാ യാത്രാ വിമാനങ്ങൾക്കും നിരോധനം ജനുവരി 1 വരെ പ്രാബല്യത്തിൽ വരുമെന്ന് നെതർലാൻഡ്‌സ് അറിയിച്ചു.

ഇംഗ്ലണ്ടിലെ ജനസംഖ്യയുടെ മൂന്നിലൊന്ന് ക്രിസ്​മസ് ലോക്​ഡൗണിലേക്ക് പ്രവേശിച്ചതിനാലാണ് പുതിയ നീക്കങ്ങൾ നടന്നത്. വൈറസി​െൻറ രണ്ടാം വരവ്​ 'നിയന്ത്രണാതീതമാണ്'എന്ന് യുകെ ആരോഗ്യ സെക്രട്ടറി മാറ്റ് ഹാൻ‌കോക്ക് മുന്നറിയിപ്പ് നൽകിയിരുന്നു. വൈറസി​െൻറ പുതിയ വകഭേദം ലണ്ടനിലും തെക്ക്-കിഴക്കൻ ഇംഗ്ലണ്ടിലും അതിവേഗം വ്യാപിച്ചിട്ടുണ്ട്​. ക്രിസ്മസ് പദ്ധതികൾ റദ്ദാക്കാനും വീട്ടിൽ തുടരാനും ബ്രിട്ടീഷ്​ പ്രധാനമന്ത്രി ബോറിസ് ജോൺസൺ ശനിയാഴ്​ച ജനങ്ങളോട് ആവശ്യപ്പെട്ടിരുന്നു.

ക്രിസ്​മസ് മാനദണ്ഡങ്ങളിൽ ഇളവ് വരുത്തുന്നതിനുള്ള പദ്ധതികൾ റദ്ദാക്കുന്ന പുതിയ നിയന്ത്രണങ്ങൾ അദ്ദേഹം പ്രഖ്യാപിച്ചിരുന്നു. ജോൺ ഹോപ്​കിൻസ് സർവകലാശാലയുടെ കണക്കുകൾ പ്രകാരം യുകെയിൽ ഇതുവരെ 20,10,077 കോവിഡ് അണുബാധകൾ റിപ്പോർട്ട് ചെയ്തിട്ടുണ്ട്.