വൂഹാനിൽ വിമാന യാത്രയും സാധാരണ നിലയിൽ

ബെയ്​ജിങ്​: കോവിഡ്​ മഹാമാരി ആദ്യമായി കണ്ടെത്തുകയും പടർന്നുപിടിക്കുകയും ചെയ്​ത ചൈനയിലെ വൂഹാൻ പ്രവിശ്യയിൽ വിമാന യാത്രയും സാധാരണ നിലയിൽ. ആഭ്യന്തര സർവിസുകളിലാണ്​ കൂടുതൽ യാത്രക്കാർ എത്തിത്തുടങ്ങിയത്​. 2019 ഡിസംബർ അവസാനം കോവിഡ്​ ആദ്യമായി റിപ്പോർട്ട്​ ചെയ്​തതോടെ 76 ദിവസത്തെ കടുത്ത ലോക്​ഡൗണിലായ വൂഹാനിൽ ഏപ്രിൽ മുതലാണ്​ ഇളവുകൾ നൽകിത്തുടങ്ങിയത്​.

ആഭ്യന്തര വിമാന സർവിസ്​ പൂർണമായും പുനരാരംഭിച്ചതോടെ ജീവിതം സാധാരണ നിലയിലേക്ക്​ മാറി. വെള്ളിയാഴ്​ച 500 ആഭ്യന്തര വിമാന സർവിസുകളിൽ 64,700 യാത്രക്കാരാണ്​ ഉണ്ടായിരുന്നതെന്ന്​ വൂഹാൻ തിയാൻഹെ അന്താരാഷ്​ട്ര വിമാനത്താവള അധികൃതർ അറിയിച്ചു. സോൾ, സിംഗപ്പൂർ, ക്വാലാലംപുർ, ജകാർത്ത തുടങ്ങിയ അന്താരാഷ്​ട്ര സർവിസുകൾക്കുള്ള ഒരുക്കവും ആരംഭിച്ചിട്ടുണ്ട്​.

ചൈനയിലെ പ്രധാന വ്യവസായ നഗരവും വാഹന വ്യവസായ കേന്ദ്രവുമായ വൂഹാനിൽനിന്ന്​ നേരത്തേ തന്നെ അന്താരാഷ്​ട്ര കാർഗോ വിമാന സർവിസുകൾ ആരംഭിച്ചിരുന്നു. ആംസ്​റ്റർഡാം, ന്യൂഡൽഹി തുടങ്ങിയ സ്ഥലങ്ങളി​േലക്കാണ്​ ചരക്ക്​ സർവിസ്​ നടത്തുന്നത്​.

അതിനിടെ, ചൈനയിൽ തദ്ദേശീയമായി കോവിഡ്​ കേസുകൾ റിപ്പോർട്ട്​ ചെയ്യാതായിട്ട്​ ഒരുമാസം പിന്നിട്ടു. ഞായറാഴ്​ച 10​ പേർക്കാണ്​ രോഗം സ്ഥിരീകരിച്ചത്​. ഇവരെല്ലാം വിദേശത്തുനിന്ന്​ വ​ന്നവരാണ്​.

നിലവിൽ കോവിഡ്​ ബാധിച്ച്​ രാജ്യത്ത്​ 151 പേർ ചികിത്സയിലും 357 പേർ നിരീക്ഷണത്തിലുമാണെന്ന്​ നാഷനൽ ഹെൽത്ത്​ കമീഷൻ അറിയിച്ചു.