കോവിഡ്​ സാമൂഹികമായി ഗുരുതര രോഗമല്ല; നിയന്ത്രണങ്ങൾ അവസാനിപ്പിച്ച്​ ഡെൻമാർക്ക്​

കോപ്പൻഹേഗൻ: കോവിഡ്​ നിയന്ത്രണങ്ങൾ ഒഴിവാക്കാനൊരുങ്ങി യുറോപ്യൻ യൂണിയൻ രാജ്യമായ ഡെൻമാർക്ക്​. സാമൂഹികമായി ഗുരതരമായ രോഗമല്ല കോവിഡ്​ എന്ന വിലയിരുത്തലിന്‍റെ അടിസ്ഥാനത്തിലാണ്​ നീക്കം.യുറോപ്യൻ യൂണിയനിലെ ചില രാജ്യങ്ങൾ കോവിഡ്​ നിയന്ത്രണങ്ങൾ ശക്​തമാക്കുമ്പോൾ മറ്റ്​ ചിലർ ഇതിൽ ഇളവ്​ വരുത്തുകയാണ്​.

ഒമിക്രോൺ വകഭേദം രാജ്യത്ത്​ പടർന്നു പിടിക്കുന്നതിനിടെയാണ്​ ഡെൻമാർക്ക്​ നിയന്ത്രണങ്ങൾ പിൻവലിച്ചത്​. ഒമിക്രോൺ ആരോഗ്യസംവിധാനത്തിന്​ മേൽ കടുത്ത സമ്മർദ്ദം ഉണ്ടാക്കുന്നില്ലെന്നാണ്​ ഡെൻമാർക്ക്​ സർക്കാറിന്‍റെ വിലയിരുത്തൽ. അതേസമയം, കോവിഡ്​ നിയന്ത്രണങ്ങൾ ഇനിയും കൊണ്ടു വരുമോയെന്ന്​ ഇപ്പോൾ പറയാനാവില്ലെന്ന്​ പ്രധാനമന്ത്രി മെറ്റ ​ഫ്രെഡ്രിക്സൻ പറഞ്ഞു.

നിയന്ത്രണങ്ങളോട്​ അവസാനമായി ഗുഡ്​ബൈ പറയുകയാണെന്ന്​ വിചാരിക്കരുത്​. പുതിയ കോവിഡ്​ വകഭേദം വന്നാൽ വീണ്ടും നിയന്ത്രണങ്ങൾ ഏർപ്പെടുത്തിയേക്കാമെന്നും ഡെൻമാർക്ക്​ പ്രധാനമന്ത്രി കൂട്ടിച്ചേർത്തു. കഴിഞ്ഞയാഴ്ച ഡെൻമാർക്കിൽ പ്രതിദിനം 50,000ത്തോളം പേർക്കാണ്​ കോവിഡ്​ സ്ഥിരീകരിച്ചത്​. എന്നാൽ, ആശുപത്രികളിലെ തീവ്രപരിചരണ വിഭാഗത്തിൽ പ്രവേശിപ്പിക്കപ്പെടുന്നവരുടെ എണ്ണം താരതമ്യേന കുറവാണ്​.

ഡെൻമാർക്കിന്​ പുറമേ കഴിഞ്ഞയാഴ്ച ഇംഗ്ലണ്ടും കോവിഡ്​ നിയന്ത്രണങ്ങൾ നീക്കിയിരുന്നു. മാസ്ക്​ ധരിക്കുന്നത്​ നിർബന്ധമാക്കിയത്​ ഉൾപ്പടെയുള്ള നിയന്ത്രണങ്ങളാണ്​ നീക്കിയത്​. അയർലാൻഡും സമാനമായി നിയന്ത്രണങ്ങളിൽ ഇളവ്​ നൽകിയിരുന്നു. നെതർലാൻഡ്​ ലോക്​ഡൗൺ നിയന്ത്രണങ്ങൾ പിൻവലിക്കാനുള്ള ഒരുക്കത്തിലാണ്​. ഫിൻലൻഡ്​, സെർബിയ, ആസ്​ട്രിയ തുടങ്ങിയ രാജ്യങ്ങളും നിയന്ത്രണങ്ങളിൽ ഇളവ്​ അനുവദിച്ചിട്ടുണ്ട്​.