രണ്ട്​ ഡോസ്​ വാക്​സിൻ സ്വീകരിച്ചാലും ഇൗ വിഭാഗക്കാരുടെ പ്രതിരോധ ശേഷി കൂടില്ലെന്ന്​ പഠനം

ന്യൂയോർക്ക്​: അവയവം മാറ്റിവെച്ച ആളുകൾക്ക്​ രണ്ട്​ ഡോസ്​ വാകസിൻ സ്വീകരിച്ചതിന്​ ശേഷവും രോഗപ്രതിരോധ ശേഷി കൂടുന്നില്ലെന്ന്​ പഠനം. അമേരിക്കയിലെ ജോൺസ്​ ഹോപ്​കിൻസ്​ സർവകലാശാലയിലെ ഗവേഷകർ നടത്തിയ പഠനത്തിന്‍റെ അടിസ്​ഥാനത്തിൽ ഇക്കൂട്ടർ വാക്​സിനേഷന്​ ശേഷവും കോവിഡ്​ പ്രതിരോധ മാർഗങ്ങൾ കൃത്യമായി പാലിക്കണമെന്ന്​ നിർദേശിക്കുന്നു.

സുപ്രധാന അവയവങ്ങൾ മാറ്റിവെച്ചവരിൽ മൊഡേണ, ഫൈസർ വാക്​സിനുകൾ സ്വീകരിച്ച 54 ശതമാനം ആളുകളിൽ മാത്രമാണ്​ ആന്‍റിബോഡികൾ ഉൽപാദിപ്പിക്കപ്പെട്ടത്​. ഗവേഷണത്തിലെ കണ്ടെത്തലുകൾ ജേണൽ ഓഫ്​ അമേരിക്കൻ മെഡിക്കൽ അസോസിയേഷനിൽ പ്രസിദ്ധപ്പെടുത്തിയിട്ടുണ്ട്​.

'അവയവം സ്വീകരിച്ചവർ രണ്ട് ഡോസ്​ വാക്സിൻ മതിയായ പ്രതിരോധശേഷി ഉറപ്പ് നൽകുന്നുവെന്ന് കരുതരുത്' -ജോൺസ്​ ഹോപ്​കിൻസ്​ സ്​കൂൾ ഓഫ്​ മെഡിസിനിലെ ​പ്രഫസറായ ഡോറി സെഗേവ്​ പറഞ്ഞു.

ഹൃദയം, ശ്വാസകോശം, വൃക്ക എന്നിവ സ്വീകരിക്കുന്ന ആളുകൾ പലപ്പോഴും പുതിയ അവയവത്തെ ശരീരം നിരസിക്കുന്നത് തടയുന്നതിനും മരുന്നുകൾ കഴിക്കണം. രോഗാണുക്കൾക്കെതിരെ വാക്​സിൻ വഴി ഉണ്ടാവുന്ന ആന്‍റിബോഡികൾ നിർമിക്കാനുള്ള കഴിവിനെ അത്​ തടസപ്പെടുത്തിയേക്കാമെന്നും ഗവേഷകർ പറഞ്ഞു.

അവയവമാറ്റം നടത്തിയ 658 പേരിലാണ്​ പഠനം നടത്തിയത്​. ഇവരിൽ ആർക്കും തന്നെ 2020 ഡിസംബർ 16 മുതൽ മാർച്ച്​ 13 വരെ കോവിഡ്​ സ്​ഥിരീകരിച്ചിട്ടില്ല. 658 പേരിൽ 98 പേർക്ക് (15 ശതമാനം)​ ആദ്യ ഡോസ്​ വാക്​സിൻ സ്വീകരിച്ച്​ 21 ദിവസങ്ങൾക്ക്​ ശേഷം ആന്‍റിബോഡികൾ ഉൽപാദിപ്പിക്കപ്പെട്ടതായി ഗവേഷകർ കണ്ടെത്തി.

രണ്ടാമത്തെ ഡോസ് വാക്​സിൻ സ്വീകരിച്ച്​ 29 ദിവസത്തിന്​ ശേഷം 658ൽ 357 പേരിൽ ആന്‍റിബോഡി കണ്ടെത്തി. അതായത്​ 54 ശതമാനം. രണ്ട്​ ഡോസ്​ വാക്​സിനുകളും പരിഗണിക്കു​േമ്പാൾ 658ൽ 301 പേർക്കും (46 ശതമാനം) ആന്‍റിബോഡികൾ ഉൽപാദിപ്പിക്കപ്പെട്ടിട്ടില്ല. 259 പേർക്ക്​ (39 ശതമാനം) രണ്ടാമത്തെ ഡോസിന്​ ശേഷമാണ്​ ആന്‍റിബോഡി ഉണ്ടായതെന്നും പഠനം കണ്ടെത്തി.

'ഞങ്ങളുടെ കണ്ടെത്തലുകളെ അടിസ്ഥാനമാക്കി അവയവമാറ്റ ശസ്​ത്രക്രിയ കഴിഞ്ഞവരും രോഗപ്രതിരോധ ശേഷിയില്ലാത്ത മറ്റ് രോഗികളും വാക്സിനേഷനു ശേഷവും കർശനമായ കോവിഡ് സുരക്ഷാ മുൻകരുതലുകൾ തുടരാൻ ഞങ്ങൾ നിർദേശിക്കുന്നു' -സർവകലാശാലയിലെ സർജനായ ബ്രയാൻ ബോയർസ്​കി പറഞ്ഞു.