ചുറ്റും ഇരുട്ടും ഭയവും; 12 മിനിറ്റ്​ ഹൃദയം നിലച്ചശേഷം ജീവിതത്തിലേക്ക്​ തിരിച്ചെത്തിയ യുവതിയുടെ വാക്കുകൾ

മരിച്ചതിന്​ ശേഷം എവിടെയാകും? എന്തായിരിക്കും? ഒരിക്കലെങ്കിലും ചിന്തിക്കാത്തവരുണ്ടാകില്ല. മരണത്തെ ചുറ്റിപ്പറ്റിയുള്ള കഥകളായിരിക്കും പലരുടെയും ചിന്തകൾക്ക്​ ബലം നൽകുന്നതും. ചിലർ മരണശേഷം സ്വർഗവും നരകവുമാണ്​ ചിന്തിക്കുന്നതെങ്കിൽ മരണശേഷം സമാധാനമാണെന്നും ഒന്നുമില്ലെന്നും​ വിശ്വസിക്കാനാണ്​ ചിലർക്കിഷ്​ടം.

മരണത്തിന്‍റെ വക്കി​െലത്തി ജീവൻ തിരികെ പിടിച്ച അനുഭവങ്ങൾ ചിലർക്ക്​ പങ്കുവെക്കാനുണ്ടാകും. അത്തരത്തിൽ 'നിയർ ഡെത്ത്​ എക്​സ്​പീരിയൻസ്​ ഫൗണ്ടേഷ'ന്‍റെ വെബ്​സൈറ്റിൽ പങ്കുവെച്ചിരിക്കുന്ന ഒരു യുവതിയുടെ അനുഭവക്കുറിപ്പാണ്​ ഇപ്പോൾ വൈറലാകുന്നത്​. ഹൃദയാഘാതം മൂലം 12 മിനിറ്റ്​ സാൻഡിയുടെ ഹൃദയം നിലച്ചിരുന്നു. അത്​ഭുതകരമായി ജീവിത​ത്തിലേക്ക്​ തിരിച്ചെത്തിയ സാൻഡി തന്‍റെ 12 മിനിറ്റ്​ വിവരിക്കുന്നതാണ്​ കുറിപ്പ്​. ഹൃദയമിടിപ്പ്​ മാത്രമല്ല, പ​ൾസോ, തലച്ചോറിൽ തരംഗ ചലനമോ ഒന്നും സാൻഡിക്കുണ്ടായിരുന്നില്ല. എന്നാൽ തന്‍റെ അവസാനമെന്ന്​ കരുതിയ ആ നിമിഷങ്ങൾ ഭീകരവും പേടിപ്പെടുത്തുന്നതുമായിരുന്നുവെന്നാണ്​ സാൻഡിയുടെ വാക്കുകൾ.

'ഞാൻ എവിടെയാണെന്ന്​ എനിക്കറിയാമായിരുന്നു. എന്നാൽ അവിടെനിന്ന്​ പറന്നകലുന്നതുപോലെയായിരുന്നു. ഞാൻ അവിടെയുണ്ടായിരുന്നെങ്കിലും ദശലക്ഷം മൈലുകൾക്ക്​ അപ്പുറമായിരുന്നു. എന്‍റെ ബോധം മറഞ്ഞിരുന്നതായും പ്രതികരണ ശേഷി നഷ്​ടപ്പെട്ടിരുന്നതായും സുഹൃത്തുക്കൾ പറഞ്ഞു. എന്നാൽ, അവർ എന്താണ്​ യഥാർഥത്തിൽ ആ സമയത്ത്​ പറഞ്ഞിരുന്നതെന്ന്​ എനിക്ക്​ പറയാൻ കഴിയും. അവർ എവിടെയാണെന്നും ആ സമയത്ത്​ അവരുടെ കൈകളിൽ എന്തായിരുന്നുവെന്നും എനിക്ക്​ പറയാനാകും. എന്‍റെ കണ്ണുകൾ അടഞ്ഞിരുന്നുവെങ്കിലും ഞാൻ എല്ലാം കാണുന്നുണ്ടായിരുന്നു. ഞാൻ എന്‍റെ ഓർമക​െള തിരികെ കൊണ്ടുവരാൻ ശ്രമിച്ചു. പക്ഷേ എനിക്കതിന്​ സാധിച്ചില്ല, എല്ലാം മാഞ്ഞുപോകുകയായിരുന്നു.പിന്നീട്​ എന്‍റെ കൂടെ ആരോ ഉണ്ടായിരുന്നു. അത്​ എന്നെ ഭയപ്പെടുത്തി. ഇരുട്ട്​ നിറയുന്നത്​ കണ്ടു, ചിന്തയിലും ഇരുട്ടും ഭയവുമായിരുന്നു. ഉച്ചത്തിൽ അലറികരയണമെന്ന്​ തോന്നി. പക്ഷേ എനിക്കതിന്​ കഴിഞ്ഞില്ല' -സാൻഡി എൻ.ഡി.ഇ.ആർ.എഫ്​ വെബ്​സൈറ്റിൽ കുറിച്ചു.

ആ നിമിഷങ്ങളിൽ അനുഭവപ്പെട്ട ഭയാനക സാന്നിധ്യം ​തന്നെ ഇപ്പോഴും പിന്തുടരുന്നുണ്ടെന്നും സാൻഡി കുറിച്ചു. സാൻഡിയുടെ കുറിപ്പ്​ നിമിഷങ്ങൾക്കുള്ളിൽ സമൂഹമാധ്യമങ്ങളിൽ വൈറലായി. മരണശേഷവും ജീവിതമുണ്ടെന്നതിന്‍റെ തെളിവാണ്​ സാൻഡിയുടെ അനുഭവം എന്നായിരുന്നു പലരുടെയും പ്രതികരണം.

മനുഷ്യന്‍റെ മസ്​തിഷ്​കത്തിന്‍റെ അതിജീവന തന്ത്രമാകും ഇ​ത്തരമൊരു ഭ്രമമെന്ന്​ വർഷങ്ങളായി മരണാനുഭവങ്ങളെക്കുറിച്ച്​ പഠിച്ചുകൊണ്ടിരിക്കുന്ന സാം പർണിയ അഭിപ്രായപ്പെട്ടു. മരണം കറുപ്പോ വെളുപ്പോ ആയ നിമിഷങ്ങൾ മാത്രമല്ല, അതൊരു പ്രക്രിയ കൂടിയായിരിക്കും. തലച്ചോർ പ്രവർത്തനം അവസാനിക്കു​േമ്പാൾ മനുഷ്യ ജീവിതവും അവസാനിക്കുമെന്നും​ പർണിയ ഉറപ്പിച്ച്​ പറയുന്നു.