ബ​ന്ദി​ക​ളെ മോചിപ്പിക്കാനായി ഇ​സ്രാ​യേ​ൽ ന​ട​ത്തി​യ ആ​ക്ര​മ​ണ​ത്തി​ൽ മരണം 274 ആയി

ഗ​സ്സ സി​റ്റി:​ ഹ​മാ​സ് ബ​ന്ദി​ക​ളാ​ക്കി​യ​വ​രെ മോ​ചി​പ്പി​ക്കാ​നാ​യി മ​ധ്യ​ഗ​സ്സ​യി​ലെ നു​സൈ​റാ​ത്തി​ലും ദേ​ർ അ​ൽ ബ​ലാ​ഹി​ലും ഇ​സ്രാ​യേ​ൽ ന​ട​ത്തി​യ ആ​ക്ര​മ​ണ​ത്തി​ൽ കൊ​ല്ല​പ്പെ​ട്ട​വ​രു​ടെ എ​ണ്ണം 274 ആ​യ​താ​യി ഗ​സ്സ ആ​രോ​ഗ്യ മ​ന്ത്രാ​ല​യം അ​റി​യി​ച്ചു. ഇ​വ​രി​ൽ നി​ര​വ​ധി പേ​ർ സ്ത്രീ​ക​ളും കു​ട്ടി​ക​ളു​മാ​ണ്. 700ഓ​ളം പേ​ർ​ക്ക് പ​രി​ക്കേ​ൽ​ക്കു​ക​യും ചെ​യ്തു. ഇ​വ​രെ ദേ​ർ അ​ൽ ബ​ലാ​ഹി​ലെ അ​ൽ അ​ഖ്സ ര​ക്ത​സാ​ക്ഷി ആ​ശു​പ​ത്രി​യി​ലേ​ക്ക് മാ​റ്റി.

ഇ​സ്രാ​യേ​ലി​ന്റെ ക​ര, നാ​വി​ക, ​വ്യോ​മ സൈ​നി​ക നീ​ക്ക​ത്തി​ൽ നാ​ല് ബ​ന്ദി​ക​ളെ​യാ​ണ് മോ​ചി​പ്പി​ച്ച​ത്. ഫെ​ബ്രു​വ​രി​യി​ലും ഇ​ത്ത​ര​ത്തി​ൽ ബ​ന്ദി​ക​ളെ മോ​ചി​പ്പി​ക്കാ​ൻ ഇ​സ്രാ​യേ​ൽ ക​ന​ത്ത ആ​ക്ര​മ​ണം അ​ഴി​ച്ചു​വി​ട്ടി​രു​ന്നു. ഇ​തി​ൽ 74 ഫ​ല​സ്തീ​നി​ക​ൾ കൊ​ല്ല​പ്പെ​ടു​ക​യും ര​ണ്ട് ബ​ന്ദി​ക​ളെ ര​ക്ഷ​പ്പെ​ടു​ത്തു​ക​യും ചെ​യ്തു.

നു​​സൈ​റാ​ത്തി​ലെ ര​ണ്ട് അ​പ്പാ​ർ​ട്മെ​ന്റു​ക​ളി​ൽ ക​ഴി​ഞ്ഞി​രു​ന്ന ബ​ന്ദി​ക​ളെ മോ​ചി​പ്പി​ക്കാ​നാ​യി സൈ​ന്യം പ്ര​ത്യേ​ക പ​രി​ശീ​ല​നം ന​ട​ത്തു​ക​യും വ​ൻ സ​ന്നാ​ഹ​മൊ​രു​ക്കു​ക​യും ചെ​യ്തി​രു​ന്ന​താ​യി ഇ​സ്രാ​യേ​ൽ സൈ​നി​ക വ​ക്താ​വ് ഡാ​നി​യ​ൽ ഹ​ഗാ​രി പ​റ​ഞ്ഞു.

അ​തി​നി​ടെ, മോ​ചി​ത​രാ​യി ഇ​സ്രാ​യേ​ലി​ലെ​ത്തി​യ ബ​ന്ദി​ക​ളെ പ്ര​ധാ​ന​മ​ന്ത്രി ബി​ന്യ​മി​ൻ ​നെ​ത​ന്യാ​ഹു സ​ന്ദ​ർ​ശി​ച്ചു. ബ​ന്ദി​ക​ൾ​ക്കും കു​ടും​ബാം​ഗ​ങ്ങ​ൾ​ക്കു​മൊ​പ്പ​മു​ള്ള ഫോ​ട്ടോ​ക​ളും വി​ഡി​യോ​ക​ളും പ്ര​ധാ​ന​മ​ന്ത്രി​യു​ടെ ഓ​ഫി​സ് പു​റ​ത്തു​വി​ട്ടു. എ​ന്നാ​ൽ, ബ​ന്ദി​ക​ൾ മോ​ചി​ത​രാ​യ ദി​വ​സ​വും വെ​ടി​നി​ർ​ത്ത​ൽ ക​രാ​റി​നാ​യു​ള്ള ആ​ഹ്വാ​ന​വു​മാ​യി ആ​യി​ര​ക്ക​ണ​ക്കി​ന് ഇ​സ്രാ​യേ​ലി​ക​ൾ തെ​ൽ​അ​വീ​വി​ൽ സ​ർ​ക്കാ​ർ​വി​രു​ദ്ധ പ്ര​ക​ട​നം ന​ട​ത്തി.

ഇസ്രായേലിൽ കൂട്ടക്കുരുതി തുടരുന്നതിനിടെ വെടിനിർത്തൽ നീക്കങ്ങൾ ചർച്ച ചെയ്യാൻ യു.എസ് വിദേശകാര്യ സെക്രട്ടറി ആന്റണി ബ്ലിങ്കൻ അടുത്തയാഴ്ച പശ്ചിമേഷ്യ സന്ദർശിക്കുന്നുണ്ട്.