നെതർലൻഡ്​സിൽ രണ്ടാമതും കോവിഡ്​ സ്ഥിരീകരിച്ച സ്ത്രീ മരിച്ചു

ആംസ്റ്റർഡം: നെതർലൻഡ്​സിൽ രണ്ടാമതും കോവിഡ്​ സ്ഥിരീകരിച്ച 89 വയസുകാരി മരിച്ചു. ഇത്തരത്തിൽ ലോകത്തിലെ ആദ്യത്തെ കേസാണിത്​. ലോകത്ത്​ പലയിടങ്ങളിലായി രണ്ടാമതും കോവിഡ്​ സ്ഥിരീകരിച്ച സംഭവങ്ങൾ ഉണ്ടായിട്ടുണ്ടെങ്കിലും ആദ്യമായാണ്​ ഒരാൾ മരണപ്പെടുന്നത്​. ഇതുവരെ 23 പേർക്കാണ്​ അത്തരത്തിൽ കോവിഡ്​ സ്ഥിരീകരിച്ചത്​.

അപൂർവ്വമായ ബോൺ മാരോ കാൻസർ ബാധിതയായി ചികിത്സയിലിരുന്ന സ്​ത്രീക്ക്​ ആദ്യം കോവിഡ്​ സ്ഥിരീകരിക്കുകയും പിന്നീട്​ ഭേദമാവുകയും ചെയ്​തിരുന്നു. കോവിഡ്​ ​മുക്തയായതോടെ കീമോ തെറാപ്പി തുടർന്ന സ്​ത്രീ​ രണ്ടാം ദിവസം തന്നെ വീണ്ടും കോവിഡ്​ ലക്ഷണങ്ങൾ കാണിച്ചുതുടങ്ങി.

പനിയും ശക്​തമായ ചുമയും ശ്വാസ തടസ്സവും അടക്കം സ്ഥിതി ഗുരുതരമാവുകയായിരുന്നു. പരിശോധനയിൽ കോവിഡ്​ വീണ്ടും സ്ഥിരീകരിച്ചു. 14 ദിവസത്തോളം ചികിത്സ വീണ്ടും തുടർന്നെങ്കിലും മരണത്തിന്​ കീഴടങ്ങുകയായിരുന്നു. കാൻസർ രോഗിയായതിനാൽ അവരുടെ രോഗപ്രതിരോധ ശേഷി നഷ്​ടപ്പെട്ടിരുന്നതായി നെതർലൻഡ്​സി​ മാസ്​ട്രിഷ്​ യൂണിവേഴ്​സിറ്റിയിലെ ഗവേഷകർ പറഞ്ഞു.