​കോവിഡിന്​ കാരണം 5ജി ടവറുകൾ; ടവറുകൾ തീയിട്ട്​ ന​ശിപ്പിച്ചു; ശുദ്ധ അസംബന്ധമെന്ന്​ ബ്രിട്ടീഷ്​ സർക്കാർ

ലണ്ടൻ : കോവിഡ്​ ബാധ​ പടർന്നുപിടിക്കാൻ കാരണം മൊബൈൽ ഫോൺ ​5ജി ടവറുകളാണെന്ന പ്രചരണം ശുദ്ധ മണ്ടത്തവും അപകടകരമായ വ്യാജവാർത്തയുമാണെന്ന്​ ബ്രിട്ടൻ. ഇത്തരത്തിൽ പ്രചരണത്തിന്​​​ യാതൊരു ശാസ്​ത്രീയ അടിസ്​ഥാനവുമില്ലെന്നും അടി യന്തര സാഹചര്യങ്ങളെ ഇത്തരത്തിലുള്ള പ്രചരണം പ്രതികൂലമായി ബാധിക്കുമെന്നും ദേശീയ മെഡിക്കൽ ഡയറക്​ടർ സ്​റ്റീഫൻ പോവീസ്​ പ്രതികരിച്ചു.

കോവിഡ്​ വൈറസ്​ ബാധക്ക്​ കാരണം 5ജി നെറ്റ്​വർക്കുകളാണെന്ന രീതിയിൽ വ്യാപകമായി പ്രചരണം നടന്നതിനെ തുടർന്ന്​ ലണ്ടനിലെ വിവിധ പ്രദേശങ്ങളിൽ ജനങ്ങൾ മൊബൈൽ ടവറുകൾക്ക്​ തീയിട്ടിരുന്നു. ബിർമിങ്​ഹാം, ലിവർപൂൾ, മേഴ്​സിസൈഡിലെ മെല്ലിങ്​ എന്നിവിടങ്ങളിലാണ്​ 5ജി നെറ്റ്​വർക്ക്​ ടവറുകൾ വ്യാപകമായി നശിപ്പിച്ചത്​. 5ജി നെറ്റ്​വർക്കുകൾ ​കോവിഡിന്​ കാരണമാകുമെന്ന്​ പറഞ്ഞ്​ യുട്യൂബിലും ഫേസ്​ബുക്കിലും വ്യാജവാർത്തകൾ പരന്നിരുന്നു.

ഇത്തരത്തിലുള്ള തിയറികൾ ശുദ്ധ അസംബന്ധമാണ്​, ഏറ്റവും മോശം വ്യാജവാർത്തയാണെന്നും അദ്ദേഹം കൂട്ടിച്ചേർത്തു. ഈ സാഹചര്യത്തിൽ ആരോഗ്യ പ്രവർത്തകർക്കും രോഗബാധിതർക്കും ഏറ്റവുമധികം ആവശ്യമായിവരുന്ന സേവനം മൊബൈൽ ഫോൺ നെറ്റ്​വർക്കുകളാണ്​. എന്നാൽ ഈ ഘട്ടത്തിൽ ഇവ തീയിട്ട്​ നശിപ്പിക്കുന്നതുപോലുള്ള നടപടികൾ നിരാശപ്പെടുത്തുന്നതായും പോവിസ്​ പറഞ്ഞു.