സിറിയയിലെ യു.എസ്​ ആക്രമണത്തെ കുറിച്ച്​ വിവരമില്ല -റഷ്യ

മോസ്​കോ: സിറിയയിൽ ഐ.എസ്​ സ്ഥാപകൻ അബുബക്കർ അൽ ബാഗ്​ദാദിയെ വധിക്കാൻ യു.എസ്​ നടത്തിയ സൈനിക നീക്കത്തെ കുറിച്ച്​ വിശ്വാസയോഗ്യമായ വിവരമില്ലെന്ന്​ റഷ്യ. റഷ്യൻ പ്രതിരോധ മന്ത്രാലയം വക്​താവ്​ മേജർ ജനറൽ ഇഗോർ കോനഷ്​കിനോവാണ്​ ഇക്കാര്യം അറിയിച്ചത്​.

യു.എസിന്​ ആക്രമണം നടത്താൻ സിറിയയിലെ റഷ്യൻ സൈന്യം ഏതെങ്കിലും തരത്തിലുള്ള സഹായം നൽകിയോയെന്നത്​ അറിയില്ലെന്നും അദ്ദേഹം വ്യക്​തമാക്കി. ബാഗ്​ദാദിയുടെ മരണം സിറിയയിലെ മറ്റ്​ തീവ്രവാദികൾക്കെതി​രായ പോരാട്ടം ഇല്ലാതാക്കില്ലെന്നും അദ്ദേഹം കൂട്ടിച്ചേർത്തു.

കഴിഞ്ഞ ദിവസമാണ്​ അബുബക്കർ അൽ ബാഗ്​ദാദിയെ വധിക്കാൻ യു.എസ്​ സൈന്യം ആക്രമണം നടത്തിയത്​. ആക്രമണത്തെ പിന്തുണച്ച റഷ്യ, ഇറാഖ്, സിറിയ, തുർക്കി, കുർദ്ദ്​ സേന​ തുടങ്ങിയവർക്ക്​ ട്രംപ്​ നന്ദിയറിയിക്കുകയും ചെയ്​തിരുന്നു.