റഷ്യയിൽ 20,000 ടൺ ഡീസൽ നദിയിൽ ചോർന്നു; സർക്കാർ വിവരമറിഞ്ഞത്​ രണ്ട്​ ദിവസത്തിന്​ ശേഷം

മോസ്​കോ: സൈബീരിയയിലെ നദിയിൽ 20,000 ടൺ ഡീസൽ ചോർന്നതിനെ തുടർന്ന്​ അടിയന്തരാവസ്ഥ പ്രഖ്യാപിച്ച്​ റഷ്യൻ പ്രസിഡൻറ്​ വ്ലാഡിമിർ പുടിൻ. ​സൈബീരിയൻ നഗരമായ നോറിലസ്​ക്കിലെ​ വൈദ്യുത പ്ലാൻറിൽ നിന്നാണ്​ ഡീസൽ ചോർന്നത്​. രണ്ട്​ ദിവസത്തിന്​ ശേഷമാണ്​ വിവരം പുടിനറിഞ്ഞത്​. ഇതിൽ അദ്ദേഹം അതൃപ്​തി പ്രകടിപ്പിച്ചുവെന്നാണ്​ വിവരം. ലോകപ്രശസ്​ത പലേഡിയം ഉൽപാദകരായ നൊറിൽസ്​ നിക്കലി​​െൻറ പ്ലാൻറിൽ നിന്നാണ്​ ചോർച്ചയുണ്ടായിരിക്കുന്നത്​.

വൈദ്യുത പ്ലാൻറിൽ നിന്ന്​ അബർനയ നദിയിലേക്ക്​ ഡീസൽ ഒഴുകുന്നത്​ തടയാൻ ശ്രമിച്ചെങ്കിലും കാര്യങ്ങൾ കൈവിട്ട് ​പോകുകയായിരുന്നു. പരിസ്ഥിതി ദുർബലമായ ആർട്ടിക്​ സമുദ്രത്തിലേക്ക്​ നീളുന്ന മറ്റൊരു നദിയിലേക്കാണ്​ അർബയ നദി ചെന്ന്​ ചേരുന്നത്​​. ഡീസൽ ചോർന്ന വിവരം അറിയിക്കാൻ വൈകിയ നൊർൽസ്​ നിക്കലി​​െൻറ നടപടിയെ കടുത്ത ഭാഷയിലാണ്​ പുടിൻ വിമർശിച്ചത്​.

സംഭവത്തെ കുറിച്ച്​ അറിയാൻ സർക്കാർ ഏജൻസികൾ എന്തുകൊണ്ടാണ്​ രണ്ട്​ ദിവസമെടുത്തത്​. സമൂഹമാധ്യമങ്ങൾ വഴിയാണോ സർക്കാർ ഏജൻസികൾ ഇക്കാര്യമറിയേണ്ടതെന്ന്​ പ്ലാൻറി​​െൻറ മേധാവി സെൽജെയ്​ ലിപിനോട്​ പുടിൻ ചോദിച്ചു. സമൂഹമാധ്യമങ്ങൾ വഴിയാണ്​ താൻ വിവരം അറിഞ്ഞതെന്ന്​ സൈബീരിയൻ ഗവർണർ അലക്​സാണ്ടർ ഉസ്​ പുടിനെ അറിയിച്ചിരുന്നു.