വിമാനാപകടം: 11 യു​ക്രെയ്​ൻകാരുടെ മൃതദേഹം നാട്ടിലെത്തിച്ചു

കിയവ്​: അബദ്ധത്തിൽ ഇറാൻ ​സൈന്യം വെടിവെച്ചുവീഴ്​ത്തിയ യു​ക്രെയ്​ൻ വിമാനത്തിലെ 11 പേരുടെ മൃതദേഹങ്ങൾ തലസ്​ഥാനമാ യ കിയവിലെത്തിച്ചു. ഒമ്പതു​ വിമാനജീവനക്കാരുടെയും രണ്ടു യാത്രക്കാരുടെയും മൃതദേഹങ്ങളാണ്​ എത്തിച്ചത്​. ബോറിസ് ​പിൽ അന്താരാഷ്​ട്ര വിമാനത്താവളത്തിലെത്തിച്ച മൃതദേഹങ്ങൾക്ക്​ യുക്രെയ്​ൻ പ്രസിഡൻറ്​ വ്ലാദിമിർ സെലൻസ്​കി, പ്രധാനമന്ത്രി ഒലക്​സി ഗൊഞ്ചറുക്​ ഉൾപ്പെടെയുള്ള ഉന്നതർ അന്തിമോപചാരം അർപ്പിച്ചു.

സഹപ്രവർത്തകരുടെ മൃതദേഹങ്ങളേറ്റുവാങ്ങിയ യുക്രെയ്​ൻ ഇൻറർനാഷനൽ എയർലൈൻസ്​ ജീവനക്കാരിൽ പലരും വിങ്ങിപ്പൊട്ടി. ജനുവരി എട്ടിന്​ തെഹ്​റാൻ വിമാനത്താവളത്തിൽനിന്ന്​ കിയവിലേക്കു​ പുറപ്പെട്ട ബോയിങ്​ 737 വിമാനമാണ്​ അബദ്ധത്തിൽ വെടിവെച്ചുവീഴ്​ത്തിയത്​. വിമാനത്തിലുണ്ടായിരുന്ന 176 പേരും കൊല്ലപ്പെട്ടിരുന്നു.