ജ്യൂസ് ഫാക്ടറിയിൽ തീപിടിച്ച്​ 52 പേർ മരിച്ചു

ധാക്ക: ബംഗ്ലാദേശിലെ നാരായൺഗഞ്ചിൽ ആറ് നില ജ്യൂസ് ഫാക്ടറിയിൽ തീപിടിച്ച്​ 52 പേർ വെന്തുമരിച്ചു. നിരവധി പേർക്ക് പരിക്കേറ്റതായും അധികൃതർ അറിയിച്ചു.

ഹാഷിം ഫുഡ് ആൻഡ് ബീവറേജ് ഫാക്ടറിയിലാണ്​ തീ പിടിത്തമുണ്ടായത്​. നാരായൺഗഞ്ച്, ധാക്ക എന്നിവിടങ്ങളിൽ നിന്നുള്ള 18 അഗ്നിശമന യൂനിറ്റുകൾ കഠിനപ്രയത്​നത്തിലൂടെയാണ്​ തീയണച്ചത്​. വ്യാഴാഴ്ച വൈകീട്ട് അഞ്ചരയോടെയായിരുന്നു സംഭവം. വെള്ളിയാഴ്ച പുലർച്ചെ തീ നിയന്ത്രണ വിധേയമായിരുന്നെങ്കിലും കെട്ടിടത്തിന്‍റെ അഞ്ചും ആറും നിലകളിൽ വീണ്ടും തീ പടർന്നു.

തീയിൽനിന്ന്​ രക്ഷപ്പെടാൻ നിരവധി തൊഴിലാളികൾ കെട്ടിടത്തിൽ നിന്ന് ചാടിയതും മരണസംഖ്യ വർധിക്കാൻ ഇടയാക്കി. ചാടിയവരിൽ മൂന്നുപേർ വ്യാഴാഴ്ച തന്നെ മരിച്ചു. നിരവധിപേർക്ക്​ സാരമായി പരിക്കേറ്റു. കാണാതായ തങ്ങളുടെ പ്രിയപ്പെട്ടവരെ തേടി ആളുകൾ കെട്ടിടത്തിന് മുന്നിൽ തടിച്ചുകൂടിയിട്ടുണ്ട്​.

സംഭവ സമയത്ത് ഫാക്ടറിയിലേക്കുള്ള ഏകവഴി പൂട്ടിയിരിക്കുകയാരുന്നുവെന്ന്​ തൊഴിലാളികളുടെ ബന്ധുക്കൾ ആരോപിച്ചു. കെട്ടിടത്തിന് ശരിയായ അഗ്നി സുരക്ഷാ സംവിധാനങ്ങളില്ലെന്നും അവർ പറഞ്ഞു.

തീ പൂർണമായും നിയന്ത്രണവിധേയമാക്കാൻ ഇനിയും സമയമെടുക്കുമെന്ന് നാരായൺഗഞ്ച് ജില്ല ഫയർ സർവിസ് ഡെപ്യൂട്ടി ഡയറക്ടർ അബ്ദുല്ല അൽ അറേഫിൻ പറഞ്ഞു. ''എത്രമാത്രം നാശനഷ്ടമുണ്ടായെന്നും തീപ്പിടിത്തത്തി​ന്‍റെ കാരണം എന്താണെന്നും ഇപ്പോൾ കൃത്യമായി പറയാൻ കഴിയില്ല," അദ്ദേഹം കൂട്ടിച്ചേർത്തു. സംഭവത്തെ കുറിച്ച്​ അന്വേഷിക്കാൻ ജില്ലാ ഭരണകൂടം അഞ്ചംഗ അന്വേഷണ സമിതി രൂപവത്​കരിച്ചു.