വരുന്നതിലധികവും കൈയോ, കാലോ അറ്റുപോയവർ; പരിക്കേറ്റവരാൽ നിറഞ്ഞ് ​ഗസ്സയിലെ ആശുപത്രി

ഗസ്സ സിറ്റി: ഫലസ്തീന് നേരെ ഇസ്രായേൽ നടത്തുന്ന നരനായാട്ട് തുടരുന്നതിനിടെ പരിക്കേറ്റവരാൽ നിറഞ്ഞ് ​ഗസ്സയിലെ ആശുപത്രി. കഴിഞ്ഞദിവസം രാത്രി ഇസ്രായേൽ നടത്തിയ വ്യോമാക്രമണങ്ങളിൽ നിരവധി പേർക്കാണ് പരിക്കേറ്റത്.

ആശുപത്രിയിൽ ചുറ്റും ഭീതിനിറഞ്ഞ രം​ഗങ്ങളാണ്. നിരവധി പേരാണ് പരിക്കേറ്റ് ആശുപത്രിയിലെത്തുന്നത്. ബോംബാക്രമണത്തിൽ പരിക്കേറ്റ പലർക്കും കൈയോ, കാലോ അറ്റുപോയിരുന്നുവെന്ന് ​ഗസ്സ സിറ്റിയിലെ അൽഷിഫ ആശുപത്രി നഴ്സ് ഷൈമ അഹ്മദ് ഖ്വൈദർ പറഞ്ഞു.

ജീവിതത്തിൽ ഇതുവരെ ഇത്തരം രം​ഗങ്ങൾ കണ്ടിട്ടില്ല. കരളലയിപ്പിക്കുന്ന രം​ഗങ്ങളാണ് ചുറ്റും -ഷൈമ അഹ്മദ് അൽജസീറ ചാനലിനോട് പറഞ്ഞു.

കെട്ടിടങ്ങൾ തകർന്ന് റോഡുകളിൽ വീണുകിടക്കുന്നതിനാൽ രക്ഷാ പ്രവർത്തകർക്കും പെട്ടെന്ന് പരിക്കേറ്റവരുമായി ആശുപത്രിയിലേക്ക് എത്താനാവാത്ത സ്ഥിതിയാണ്. ‌ഇസ്രായേൽ ആക്രമണങ്ങളിൽ 1200 പേർക്കാണ് പരിക്കേറ്റതെന്ന് ​ഗസ്സ ആരോ​ഗ്യമന്ത്രാലയം അറിയിച്ചു.

പരിക്കേറ്റവരിൽ പകുതിയോളം കുട്ടികളും സ്ത്രീകളുമാണ്. റോഡുകളിലൂടെയുള്ള യാത്ര ഇല്ലാതാക്കണമെന്ന ലക്ഷ്യത്തിൽ ഇസ്രായേൽ സൈന്യം കെട്ടിടങ്ങൾ തകർക്കുകയാണെന്ന് ആരോ​ഗ്യമന്ത്രാലയം വക്താവ് ഡോ. മിദ്ഹത് അബ്ബാസ് പറഞ്ഞു.

ഇസ്രായേൽ പ്രധാനമന്ത്രി ബിന്യമിൻ നെതന്യാഹു ജയിൽ ശിക്ഷയിൽ നിന്ന് രക്ഷ നേടാനായി ഫലസ്തീൻ കുട്ടികളെ കൊലപ്പെടുത്തുകയാണെന്നും അദ്ദേഹം കൂട്ടിച്ചേർത്തു.

നിലവിൽ ​​ഗസ്സയിലെ ആശുപത്രി നിറഞ്ഞു കവിഞ്ഞു. ഇസ്രായേൽ ഉപരോധവും കോവിഡ് മഹാമാരിയുടെയും പശ്ചാത്തലത്തിൽ ​ഗസ്സയിൽ മരുന്നുകളുടെയും ആരോഗ്യ സംവിധാനങ്ങളുടെയും ലഭ്യതക്കുറവുണ്ട്. രോ​ഗികൾ ഈ അവസരത്തിൽ ഈജിപ്തിലേക്ക് പോകുമെന്ന് പ്രതീക്ഷിക്കുന്നുവെന്നും മിദ്ഹത് അബ്ബാസ് വ്യക്തമാക്കി.