ജോര്‍ജ് ഫ്‌ളോയിഡിന്‍റെ പ്രതിമക്ക് നേരെ തീവ്രസ്വഭാവമുള്ള വെളുത്ത വർഗക്കാരുടെ ആക്രമണം

ന്യൂയോര്‍ക്ക്: അമേരിക്കയില്‍ പൊലീസുകാരൻ ശ്വാസം മുട്ടിച്ച് കൊലപ്പെടുത്തിയ കറുത്ത വര്‍ഗക്കാരനായ ജോര്‍ജ് ഫ്‌ളോയിഡിന്‍റെ പ്രതിമക്ക് തീവ്രസ്വഭാവമുള്ള വെളുത്ത വർഗക്കാരുടെ ആക്രമണം.

ഫ്‌ളോയിഡിന്‍റെ പ്രതിമയിലേക്ക് കറുത്ത പെയിന്റ് ഒഴിച്ചായിരുന്നു ആക്രമണം. വെളുത്ത വലതുപക്ഷ വിദ്വേഷ ഗ്രൂപ്പായി കണക്കാക്കപ്പെടുന്ന സംഘം പ്രതിമക്കടുത്ത് വെളുത്ത പെയിന്റ് ഉപയോഗിച്ച് 'പാട്രിയറ്റ്‌സ് ഫ്രണ്ട് യു.എസ്' എന്നും എഴുതിയിട്ടുണ്ട്. സംഭവത്തെക്കുറിച്ച് അന്വേഷിച്ചുവരികയാണെന്ന് ന്യൂയോർക് പൊലീസ് അറിയിച്ചു.

അമേരിക്കന്‍ നഗരമായ മിനപോളിസില്‍ വെച്ച് 2020 മെയ് 25നാണ് ജോര്‍ജ് ഫ്ളോയിഡ് കൊല്ലപ്പെട്ടത്. പൊലീസ് കസ്റ്റഡിയിലെടുത്ത ഫ്‌ളോയിഡിനെ വെള്ളക്കാരനായ പൊലീസ് ഉദ്യോഗസ്ഥന്‍ ഡെറക് ചൗവിന്‍ കാല്‍മുട്ടുകൊണ്ട് കഴുത്ത് ഞെരിച്ച് കൊല്ലുകയായിരുന്നു. ഇതിന് പിന്നാലെ അമേരിക്കയില്‍ ബ്ലാക്ക് ലൈവ്‌സ് മാറ്റര്‍ പ്രതിഷേധം ശക്തമായി.