അപകീർത്തി കേസിൽ ഹാരിയെയും മേഗനെയും ചോദ്യം ചെയ്യും

ലണ്ടൻ: സഹോദരി നൽകിയ അപകീർത്തി കേസുമായി ബന്ധപ്പെട്ട് മേഗൻ മാർക്കിളും ഹാരി രാജകുമാരനും ചോദ്യം ചെയ്യാൻ ഹാജരാകും. തെറ്റായ കാര്യം പ്രചരിപ്പിച്ചുവെന്നാരോപിച്ചാണ് സഹോദരി സാമന്ത മേഗനെതിരെ യു.എസ് കോടതിയിൽ പരാതി നൽകിയത്.

2021 ൽ ഓപറ വിൻഫ്രിക്ക് നൽകിയ അഭിമുഖത്തിനിടെ താൻ ഒറ്റക്കുട്ടിയാണെന്ന് മേഗൻ കള്ളം പറഞ്ഞുവെന്നാരോപിച്ചാണ് സാമന്ത പരാതി നൽകിയത്. ഈ അഭിമുഖത്തിലാണ് രാജകുടുംബത്തിൽ താൻ നേരിട്ട വിവേചനത്തെ കുറിച്ച് മേഗൻ വെളിപ്പെടുത്തിയത്.

മേഗന്റെ അർധ സഹോദരിയാണ് സാമന്ത. ലോകവ്യാപകമായി അഞ്ചുകോടി ആളുകളാണ് മേഗന്റെ അഭിമുഖം കണ്ടതെന്നും അവരെയെല്ലാം കള്ളം പറഞ്ഞ് തെറ്റിദ്ധരിപ്പിക്കുകയായിരുന്നുവെന്നും സാമന്ത പരാതിയിൽ ആരോപിച്ചിരുന്നു.