കപ്പിനും ചുണ്ടിനും ഇടയിൽ ഐസ്​ലന്‍റിന്​ ആ ഖ്യാതി നഷ്​ടപ്പെട്ടു; ഞങ്ങളിതൊക്കെ എന്നേ നേടിയല്ലോ എന്ന്​ അഞ്ച്​ രാജ്യങ്ങൾ

റെയ്​ക്​സക്​(ഐസ്​ലന്‍റ്​): യൂറോപ്പിൽ വനിതകൾക്ക്​ ഭൂരിപക്ഷമുള്ള ആദ്യ പാർലമെന്‍റ്​ എന്ന ഖ്യാതി ഐസ്​ലന്‍റിന്​ കയ്യകലത്തിൽ നഷ്​ടപ്പെട്ടു. കഴിഞ്ഞ ദിവസം ഫലം വന്നപ്പോൾ 63 ൽ 33 സീറ്റുകൾ വനിതകൾ ജയിച്ചിരുന്നു. ആകെ സീറ്റിന്‍റെ 52 ശതമാനം സീറ്റുകൾ വനിതകൾ വിജയിച്ചതോടെ വനിതാ ഭൂരിപക്ഷ പാർലമെന്‍റ്​ യഥാർഥ്യമാകുമെന്ന്​ തന്നെയാണ്​ കരുതിയിരുന്നത്​. എന്നാൽ, റീ കൗണ്ടിങ്ങിൽ ഫലം മാറുകയായിരുന്നു.

റീ കൗണ്ടിൽ വനിതകളുടെ പ്രാതിനിധ്യം 30 ആയി കുറഞ്ഞു. 47.6 ശതമാനമാണിത്​. വനിതകൾക്ക്​ ആകെ അംഗങ്ങളുടെ പകുതി എത്താനായില്ലെങ്കിലും യൂറോപ്യൻ രാജ്യങ്ങളിലെ വനിതകളുടെ കൂടിയ പ്രാതിനിധ്യം ഐസ്​ലന്‍റിന്​ തന്നെയാണ്​. തൊട്ടുപിറകിലുള്ളത്​ സ്വീഡനാണ്​, 47 ശതമാനം.

വേൾഡ്​ എകണോമിക്​ ഫോറത്തിന്‍റെ റിപ്പോർട്ടനുസരിച്ച്​ ലിംഗ സമത്വത്തിന്‍റെ കാര്യത്തിൽ ലോക റാങ്കിങിൽ ഒന്നാമതുള്ള രാജ്യമാണ്​ ഐസ്​ലന്‍റ്​. കഴിഞ്ഞ 12 വർഷമായി ഈ റാങ്കിന്‍റെ അവകാശികൾ ഐസ്​ലന്‍റ്​ തന്നെയാണ്​.

കുഞ്ഞ്​ പിറക്കു​േമ്പാൾ പരിചരണത്തിന്​ മാതാവിനും പിതാവിനും ഒരു പോലെ അവധി നൽകുന്ന രാജ്യമാണ്​ ഐസ്​ലന്‍റ്​. പുരുഷനും സ്​ത്രീക്കും തുല്യ വേതനത്തിനായി 1961 ൽ തന്നെ ഇവിടെ നിയമമുണ്ടാക്കുകയും ചെയ്​തിട്ടുണ്ട്​. ലോകത്ത്​ ആദ്യമായി ഒരു രാജ്യത്തിന്​ വനിത പ്രസിഡന്‍റ്​ ഉണ്ടായതും ഇവിടെയാണ്​, 1980 ൽ ആയിരുന്നു അത്​.

അതേസമയം, പാർല​െമന്‍റിൽ വനിതാ പ്രാതിനിധ്യം 50 ശതമാനമോ അതിന്​ മുകളിലോ ഉള്ള അഞ്ചു രാജ്യങ്ങൾ യൂറോപ്പിന്​ പുറത്തുണ്ട്​. ആഫ്രിക്കൻ രാജ്യമായ റുവാണ്ടയാണ്​ വനിതാ പ്രാതിനിധ്യത്തിൽ ഏറ്റവും മുകളിൽ. ഇവിടെ 61.3 ശതമാനം പാർലമെന്‍റ്​ അംഗങ്ങളും വനിതകളാണ്​. ക്യൂബയിൽ 53.4 ശതമാനവും നികരാഗ്വേയിൽ 50.6 ശതമാനവും യു.എ.ഇ, മെക്​സികോ എന്നീ രാജ്യങ്ങളിൽ 50 ശതമാനവുമാണ്​ പാർല​െമന്‍റിലെ വനിതാ പ്രാതിനിധ്യം.

വികസിത രാജ്യങ്ങളായി കണക്കാക്കുന്ന അമേരിക്കയിൽ 27.6 ശതമാനവും യു.കെയിൽ 34.2 ശതമാനവും മാത്രമാണ്​ നിയമനിർമാണ സഭകളിലെ വനിതാ പ്രാതിനിധ്യം.