'ചിലർ എ​െൻറ മരണം ആഗ്രഹിച്ചു' യാഥാസ്​ഥിതിക വിമർശകർക്കെതിരെ പോപ്​

റോം: വൻകുടൽ ശസ്​ത്രക്രിയക്ക്​ വിധേയനായ സമയത്ത്​ ചിലർ ത​​െൻറ മരണം ആഗ്രഹിച്ചിരുന്നതായി ഫ്രാൻസിസ്​ മാർപാപ്പയുടെ വെളിപ്പെടുത്തൽ. ഈ മാസം 12ന്​ ​സ്ലൊവാക്യൻ പുരോഹിതരുമായി നടത്തിയ സ്വകാര്യ സംഭാഷണത്തിലാണ്​ പോപ്​ മനസുതുറന്നത്​.

സംഭാഷണത്തിനിടെ സുഖമായിരിക്കുന്നുവോ എന്ന പുരോഹിത​െൻറ ചോദ്യത്തിനായിരുന്നു അദ്ദേഹത്തി​െൻറ പ്രതികരണം. ''പലരും എ​െൻറ മരണം ആഗ്രഹിച്ചു. ആരോഗ്യ സ്​ഥിതി ഗുരുതരമാണെന്ന്​ കരുതി കർദിനാൾമാർ പുതിയ പോപ്പിനെ തെരഞ്ഞെടുക്കാൻ രഹസ്യയോഗം വരെ ചേർന്നു.ദൈവകൃപയാൽ ഞാനിപ്പോഴും ജീവിച്ചിരിക്കുന്നു''-മാർപാപ്പ പറഞ്ഞു.

ശസ്​ത്രക്രിയക്കായി 10 ദിവസം ആശുപത്രിയിൽ കഴിഞ്ഞ സമയത്ത്​ മാർപാപ്പ സ്​ഥാനമൊഴിഞ്ഞേക്കു​മെന്നു വരെ ഒരു ഇറ്റാലിയൻ പത്രം എഴുതി. എന്നാൽ അങ്ങനെയൊന്നിനെക്കുറിച്ച്​ ആലോചിച്ചിട്ടു പോലുമില്ലെന്ന്​ പിന്നീട്​ മാർപാപ്പ പറഞ്ഞു. കത്തോലിക്ക സഭയിലെ അധ്യക്ഷനായ മാർപാപ്പ യാഥാസ്​ഥിതികമായ പല കാഴ്​ചപ്പാടുകളുടെയും നിശിത വിമർശകനാണ്​. മുതലാളിത്ത വ്യവസ്​ഥിയോടു നിരന്തരം കലഹിക്കുന്ന, പരിസ്​ഥിതി സംരക്ഷണത്തിനും കുടിയേറ്റക്കാരുടെ അവകാശങ്ങൾക്കുമായുള്ള അദ്ദേഹത്തി​െൻറ നിലപാടുകളോട്​ യാഥാസ്​ഥിതിക വിഭാഗത്തിന്​ എതിർപ്പാണ്​.