ഇ​ന്തോനേഷ്യക്ക് ഇനി പുതിയ തലസ്ഥാനം; കാരണമിതാണ്​

ജകാർത്ത: ഇന്തോനേഷ്യയുടെ തലസ്ഥാനം ജകാർത്തയിൽ നിന്ന് മാറ്റാനുള്ള തീരുമാനത്തിന് പാർലമെന്‍റി​ന്‍റെ അംഗീകാരം. പുതിയ തലസ്ഥാനത്തിന് ദ്വീപസമൂഹം എന്നർഥമുള്ള നുസാന്തര എന്നാണ് പേരുനൽകിയത്. 80 പേരുകളിൽ നിന്നാണ് നുസാന്തര തെരഞ്ഞെടുത്തത്.

ജകാർത്തയിൽ പാരിസ്ഥിതികമായ വെല്ലുവിളികൾ നിലനിൽക്കുന്നതിനാലാണ് തീരുമാനം. തലസ്ഥാനം മാറ്റുന്നതി​ന്‍റെ ഭാഗമായി സർക്കാർ ഓഫിസുകൾ കിഴക്കൻ കാലിമന്‍റാനിലേക്ക് പുനഃസ്ഥാപിച്ചു തുടങ്ങി.

2019 ൽ പ്രസിഡന്‍റ് ജോകോ വി​ദോദോ ആണ് തലസ്ഥാനം മാറ്റുന്ന കാര്യം ആദ്യം പ്രഖ്യാപിച്ചത്. കോവിഡ് കാരണം തീരുമാനം നീണ്ടുപോവുകയായിരുന്നു.

ഒരുകോടി ജനങ്ങളാണ് ജകാർത്തയിൽ താമസിക്കുന്നത്. ജാവ ദ്വീപ സമൂഹത്തിൽ ഉൾപ്പെടുന്നന ജകാർത്തയിലായിരുന്നു സർക്കാരി​​ന്‍റെ പ്രധാന ഓഫിസുകൾ.

ജാവൻ തീരത്ത് സ്ഥിതിചെയ്യുന്ന ഈ നഗരം പ്രതിവർഷം 25 സെ.മി വെച്ച് മുങ്ങിക്കൊണ്ടിരിക്കുകയാണ്. അമിതമായ അളവിൽ ഭൂഗർഭജലം ഖനനം ചെയ്തതാണ് ഇതിന് കാരണമെന്നാണ് കരുതുന്നത്. 2050 ആകുമ്പോഴേക്കും ജകാർത്തയുടെ 95 ശതമാനവും മുങ്ങുമെന്നാണ് ശാസ്ത്രജ്ഞരുടെ മുന്നറിയിപ്പ്.