ഗസ്സക്ക്​ ഖത്തർ സഹായത്തിന്​ അംഗീകാരം നൽകി ഇസ്രായേൽ

ടെൽ അവീവ്​: ഇസ്രായേൽ അകാരണമായി തുടരുന്ന കടുത്ത ഉപരോധവും നിയന്ത്രണങ്ങളും വരിഞ്ഞുമുറുക്കിയ ഗസ്സ മുനമ്പിന്​ സഹായമെത്തിക്കാൻ അനുമതി നൽകി നാഫ്​റ്റലി ബെനറ്റ്​ സർക്കാർ. മാസങ്ങൾക്ക്​ മുമ്പ്​ ഗസ്സയിൽ നടത്തിയ ആക്രമണത്തിന്‍റെ ഭാഗമായിട്ടായിരുന്നു സഹായമെത്തിക്കുന്നതിന്​ ഇസ്രായേൽ വിലക്കേർപെടുത്തിയിരുന്നത്​. ഖത്തറുമായും യു.എന്നുമായും ഇതുസംബന്ധിച്ച്​ കരാറിലെത്തിയതായി ഇസ്രായേൽ അറിയിച്ചു.

ഈജിപ്​തിന്‍റെ മധ്യസ്​ഥതയിൽ രൂപം നൽകിയ കരാർ പ്രകാരം ഗസ്സയിലെത്തുന്ന തുക ഹമാസ്​ കൈകാര്യം ചെയ്യില്ല. ആവശ്യക്കാരിൽ ഖത്തർ നേരിട്ട്​ വിതരണം ചെയ്യും. ഗസ്സയിലെ ജനങ്ങളുടെ ബാങ്ക്​ അക്കൗണ്ടുകളിലേക്ക്​ കൈമാറുന്നതാകും രീതി. സ്വീകരിക്കുന്നവരുടെ ഇടപാടുകൾ പിന്നീട്​ ഇസ്രായേൽ നിരീക്ഷിക്കും.

ഹമാസ്​ ബന്ദിയാക്കിവെച്ച ഇസ്രായേൽ തടവുകാരുടെ മോചനത്തിന്​ നീക്കം തുടരുമെന്ന്​ ഇസ്രായേലി പ്രതിരോധ മന്ത്രി ബെന്നി ഗാന്‍റ്​സ്​ പറഞ്ഞു. 2014​െല ആക്രമണത്തിനിടെയാണ്​ രണ്ട്​ ​ഇസ്രായേൽ സൈനികർ ഹമാസ്​ തടവിലായത്​. രണ്ട്​ സിവിലിയൻമാരും ഹമാസ്​ വശമുണ്ടെന്നാണ്​ ആരോപണം. വിഷയത്തിൽ ഹമാസ്​ പ്രതികരിച്ചിട്ടില്ല.

വർഷങ്ങളായി ഗസ്സയിൽ ഖത്തർ സഹായം നൽകിവരുന്നുണ്ട്​. കഴിഞ്ഞ മേയിലാണ്​ ഇത്​ വിലക്കപ്പെട്ടത്​. മേയിലെ ആക്രമണത്തിൽ 4,000 ഓളം വീടുകൾ​ ഗസ്സയിൽ ഇസ്രായേൽ ബോംബറുകൾ ചാരമാക്കിയിട്ടുണ്ട്​​. 38 കോടി ഡോളറിന്‍റെ നഷ്​ടമാണ്​ കണക്കാക്കുന്നത്​. ഇവയുടെ പുനർനിർമാണത്തിന്​ ഖത്തറും ഈജിപ്​തും ചേർന്ന്​ സഹായപദ്ധതി പ്രഖ്യാപിച്ചിരുന്നു.