ഹി​സ്ബു​ല്ലയെ ലക്ഷ്യമിട്ട് തെക്കൻ ല​ബ​നാ​നിൽ ഇസ്രായേൽ വ്യോമാക്രമണം; ശ്രമിച്ചത് റോക്കറ്റ് ലോഞ്ചറുകൾ തകർക്കാൻ

ജറൂസലം: ഹി​സ്ബു​ല്ലയെ ലക്ഷ്യമിട്ട് തെക്കൻ ല​ബ​നാ​നിലെ നഗരങ്ങളിൽ വ്യോമാക്രമണം നടത്തി ഇസ്രായേൽ സൈന്യം. ഹി​സ്ബു​ല്ലയുടെ റോക്കറ്റ് ലോഞ്ചറിന് നേരെയാണ് ഇസ്രായേൽ വ്യോമസേന ബോംബ് ആക്രമണം നടത്തിയത്. ഇത് കൂടാതെ, ഫർചൗബയിലും ഷെബയിലും പീരങ്കി ആക്രമണം നടത്തിയതായും ഇസ്രായേൽ വ്യക്തമാക്കിയതായി അൽ ജസീറ റിപ്പോർട്ട് ചെയ്തു.

ഞായറാഴ്ച തെക്കൻ ലബനനിലെ അയ്ത അൽഷാബിൽ ഹി​സ്ബു​ല്ലയുടെ റോക്കറ്റ് ലോഞ്ചറിന് നേരെയും ബൈത് ലിഫ്, തയ്ബ്, ഒഡെയ്സ എന്നിവിടങ്ങളിലെ കെട്ടിടങ്ങൾക്ക് നേരെയും ഇസ്രായേൽ ആക്രമണം നടത്തിയിരുന്നു.

ആഗസ്റ്റ് 25ന് ഇ​സ്രാ​യേ​ലിലെ സൈ​നി​ക, ര​ഹ​സ്യാ​ന്വേ​ഷ​ണ കേ​ന്ദ്ര​ങ്ങ​ളെ ല​ക്ഷ്യം വെ​ച്ച​് ഹി​സ്ബു​ല്ല കനത്ത ആക്രമണം നടത്തിയിരുന്നു. 11 ഇസ്രായേലി സൈനിക കേന്ദ്രങ്ങൾക്ക് നേരെ 321 റോക്കറ്റുകളാണ് ഹിസ്ബുല്ല തൊടുത്തുവിട്ടത്.

ഒരു മാസം മുമ്പ് ബെയ്റൂത്തിൽ ​വെച്ച് കമാൻഡറിനെ കൊലപ്പെടുത്തിയതിനുള്ള തിരിച്ചടിയാണ് ഇസ്രായേലിന് ഹിസ്ബുല്ല നൽകിയത്. പ​ക​രം വീ​ട്ടാ​ൻ ല​ബ​നാ​നി​ലെ ജ​ന​വാ​സ കേ​ന്ദ്ര​ങ്ങ​ളെ ആ​ക്ര​മി​ച്ചാ​ൽ ഇ​നി​യു​ള്ള തി​രി​ച്ച​ടി​യും ആ ​രീ​തി​യി​ലാ​കു​മെ​ന്ന് ഹി​സ്ബു​ല്ല മു​ന്ന​റി​യി​പ്പ് ന​ൽ​കി​യി​ട്ടു​ണ്ട്.

അതേസമയം, ഹിസ്ബുല്ല ആ​ക്ര​മ​ണം ഇ​സ്രാ​യേ​ലി​ൽ ഭീ​തി പ​ര​ത്തി​. മ​ന്ത്രി​മാ​രെ​യും ഉ​ന്ന​ത സൈ​നി​ക ഉ​ദ്യോ​ഗ​സ്ഥ​രെ​യും ബ​ങ്ക​റു​ക​ളി​ലേ​ക്ക് മാ​റ്റുകയും ചെ​യ്തു. കൂടാതെ, ഇസ്രായേൽ 48 മണിക്കൂർ അടിയന്തരാവസ്ഥ പ്രഖ്യാപിക്കുകയും ചെയ്തു.