ഇസ്രായേൽ പാർലമെന്‍റിൽ ബെനറ്റ്​ സർക്കാറിന്​ വോ​ട്ടെടുപ്പ്​; നെതന്യാഹു ഇന്ന്​ പടിയിറങ്ങും?

ടെൽ അവീവ്​: ഒരു വ്യാഴവട്ടക്കാലം നീണ്ട ഭരണത്തിന്​ അന്ത്യം കുറിച്ച്​ ഇസ്രായേലിൽ പുതിയ മന്ത്രിസഭ ഇന്ന്​ അധികാരമേറ്റേക്കും. ഇന്ന്​ ചേരുന്ന അടിയന്തര 'കനീസത്​' യോഗത്തിൽ നാഫ്​റ്റലി ബെനറ്റ്​ പ്രധാനമന്ത്രിയായി പുതിയ മന്ത്രിസഭ വിശ്വാസ വോ​ട്ടെടുപ്പ്​ തേടും. കേവല ഭൂരിപക്ഷം നേടാനായാൽ 12 വർഷമായി അധികാരത്തിൽ കടിച്ചുതൂങ്ങുന്ന പ്രധാനമന്ത്രി ബിൻയമിൻ നെതന്യാഹുവിന്​ പുറത്തേക്ക്​ വഴിയൊരുങ്ങും. ആർക്കും ഭൂരിപക്ഷം നേടാനായില്ലെങ്കിൽ രണ്ടു വർഷത്തിനിടെ ഇസ്രായേൽ അഞ്ചാം പാർലമെന്‍റ്​ തെരഞ്ഞെടുപ്പിലേക്കും​ നീങ്ങും.

തീവ്ര വലതു നേതാവായ നാഫ്​റ്റലി ബെനറ്റും യായർ ലാപിഡും തമ്മിലെ അധികാര വിഭജന കരാർ പ്രകാരം ആദ്യ ഊഴം ബെനറ്റിനാകും. 2023 സെപ്​റ്റംബർ വരെയാകും കാലാവധി. അതുകഴിഞ്ഞുള്ള രണ്ടു വർഷം ലാപിഡ്​ ഭരിക്കും.

ഇസ്രായേലിന്‍റെ ചരിത്രത്തിലെ ഏറ്റവും ദീർഘകാല പ്രധാനമന്ത്രിയായ നെതന്യാഹു അധികാരമൊഴിയുന്നതോടെ സഭയിലെ ഏറ്റവും വലിയ ഒറ്റക്കക്ഷിയായ ലിക്കുഡിന്‍റെ നേതാവെന്ന നിലക്ക്​ പ്രതിപക്ഷ നേതൃപദവിയിലേക്ക്​ മാറും. 'വഞ്ചനയും കീഴടങ്ങലും മുദ്രയാക്കിയ അപകടകരമായ സഖ്യമാണ്​ അധികാരമേറാൻ പോകുന്നതെന്നും അതിവേഗം അവരെ മറിച്ചിടു'മെന്നും കഴിഞ്ഞ ദിവസം നെതന്യാഹു പ്രഖ്യാപിച്ചിരുന്നു.

അതേ സമയം നിരവധി അഴിമതി, കൈക്കൂലി കേസുകളിൽ പ്രതി​േചർക്കപ്പെട്ട നെതന്യാഹു​ അധികാരം നഷ്​ടമാകുന്നതോടെ ജയിലഴികൾ എണ്ണേണ്ടിവരുമെന്ന്​ ഇസ്രായേലി പത്രങ്ങൾ പറയുന്നു. പ്രധാനമന്ത്രി പദം കൈയാളുന്നുവെന്ന ആനുകൂല്യം ഉപയോഗപ്പെടുത്തിയാണ്​ വർഷങ്ങളായി അതിൽനിന്ന്​ രക്ഷപ്പെട്ടുവന്നത്​. ഇനി പക്ഷേ, അത്​ നഷ്​ടമാകുന്നതോടെ കോടതി കയറേണ്ടിവരും.

2019നു ശേഷം നാലുവട്ടം തെരഞ്ഞെടുപ്പ്​ നടന്നിട്ടും ഇതുവരെ കേവല ഭൂരിപക്ഷം നേടാൻ നെതന്യാഹുവിനായിട്ടില്ല. വിവിധ കക്ഷികളുമായി ചേർന്ന്​​ അധികാരം പങ്കിട്ടുവന്ന രണ്ടു വർഷത്തിനൊടുവിൽ ഇത്തവണ അതും നടപ്പാകാതെ വന്നതോടെ രണ്ടാമത്തെ വലിയ കക്ഷിയായ യെഷ്​ അതിദിന്‍റെ യായർ ലാപിഡിനെ മന്ത്രിസഭയുണ്ടാക്കാൻ പ്രസിഡന്‍റ്​ ക്ഷണിക്കുകയായിരുന്നു.

പുതുമകളേറെ, ​അതിജീവിക്കുമോ ബെനറ്റ്​ മന്ത്രിസഭ

ഇസ്രായേലിന്‍റെ 73 വർഷ ചരിത്രത്തിൽ ആദ്യമായാണ്​ അറബ്​ കക്ഷി കൂടി ഒരു മന്ത്രിസഭയിൽ പങ്കാളിയാകുന്നത്​. നാല്​ അംഗങ്ങളുള്ള 'റാം' ആണ്​ കക്ഷി. 17 അംഗങ്ങളുള്ള യെഷ്​ അതിദ്​, എട്ടു പേരുള്ള ബ്ലൂ ആന്‍റ്​ വൈറ്റ്​, ഏഴുപേരുമായി യിസ്​റയേൽ ബെയ്​തയ്​നു, ലേബർ, ആറു അംഗങ്ങളുള്ള യമീന, ന്യൂ ഹോപ്​, മെററ്റ്​സ്​ എന്നിവരടങ്ങിയ എട്ടുകക്ഷി സഖ്യമാണ്​ ഭരണമേറുന്നത്​. പ്രതിപക്ഷത്ത്​ 59 അംഗങ്ങളുമുണ്ട്​.

അറബ്​ കക്ഷി കൂടി ഭാഗമാകുന്ന മന്ത്രിസഭയിൽ ഫലസ്​തീനി വിഷയങ്ങൾ വരുന്നതോടെ ഭിന്നതക്ക്​ സാധ്യതയേറെയാണെന്നതിനാൽ മന്ത്രിസഭ എത്രനാൾ അതിജീവിക്കുമെന്നാണ്​ വലിയ ചോദ്യം. യമീന, ന്യൂ ഹോപ്​ തുടങ്ങിയ കക്ഷികൾ ജൂത കുടിയേറ്റത്തെ പിന്തുണക്കു​േമ്പാൾ ജനസംഖ്യയുടെ 21 ശതമാനം വരുന്ന അറബികളുടെ പ്രതിനിധികളായ 'റാം' ഒരിക്കലും കൂടെനിൽക്കില്ലെന്നുറപ്പാണ്​.

'ബൈ ബൈ ബീബി'

ആഗോള മാധ്യമങ്ങൾക്ക്​ മുന്നിൽ രണ്ടു പതിറ്റാണ്ടിലേറെയായി ഇസ്രായേലിന്‍റെ മുഖമായ നെതന്യാഹു ഒരിക്കലും ഇഷ്​ടപ്പെടാതെയാണ്​ പടിയിറങ്ങേണ്ടിവരുന്നത്​. 1996-99 കാലയളവിൽ ആദ്യമായി ഇസ്രായേൽ പ്രധാനമന്ത്രിയായ നെതന്യാഹു പിന്നീട്​ 2009 മുതൽ തുടർച്ചയായി ആ പദവിയിൽ തുടരുകയാണ്​. കടുത്ത അറബ്​ വിരുദ്ധതയും വിഭാഗീയതയുമായി അധികാരം നിലനിർത്തിയ 'ബിബി' അതിനായി വളർത്തിയ തീവ്ര ജൂത ദേശീയത നിയന്ത്രിക്കാനാവാത്തവിധം അപകടമകരമായി വളരുന്നതാണ്​ നിലവിലെ കാഴ്ച. കടുത്ത വംശീയ വാദികൾ ഇഷ്​ടത്തോടെ ഒപ്പംനിർത്തുന്ന നെതന്യാഹുവിന്​ ശരാശരി ഇസ്രായേലിയുടെ പിന്തുണ പോലും ഉറപ്പിക്കാനാകാതെ വന്നതോടെയാണ്​ അധികാരത്തിന്​ പുറത്തേക്ക്​ വഴി തുറക്കുന്നത്​. സ്വന്തം താൽപര്യങ്ങൾക്കു വേണ്ടി പരമാവധി ഹിംസയെ പ്രോൽസാഹിപ്പിക്കുന്ന രീതിയായതിനാൽ 'ക്രൈം മിനിസ്റ്റർ' എന്നുവരെ സഹകക്ഷികൾ വിളിക്കുന്നു.

ബിബിക്ക്​ പുറത്തേക്ക്​ വഴി തുറന്നതോടെ ജറൂസലമിൽ ഔദ്യോഗിക വസതിക്ക്​ പുറ​ത്ത്​ 2,000 ലേറെ പേർ പുറത്താകൽ ആഘോഷമാക്കാൻ തടിച്ചുകൂടിയത്​ ശ്രദ്ധേയമായി.