സർക്കാർ പിന്നാലെ; ചൈനയിൽ ഏറ്റവും വലിയ സമ്പന്നനെന്ന പദവി കൈവിട്ട്​ ജാക്​ മാ

ബെയ്​ജിങ്​: സർക്കാർ വിരുദ്ധ നിലപാടുകളുടെ പേരിൽ ഭരണകൂടത്തിന്‍റെ കണ്ണിലെ കരടായി മാറിയ ആലിബാബ, ആന്‍റ്​ ഗ്രൂപ്​ സ്ഥാപനങ്ങളുടെ മേധാവി ജാക്​ മാക്ക്​ ചൈനയിൽ ഏറ്റവും വലിയ സമ്പന്നനെന്ന പദവി നഷ്​ടമായി. 2020ലും 2019ലും ഒന്നാം സ്​ഥാനത്ത്​ വെല്ലുവിളികളില്ലാതെ തുടർന്ന മാ ഏറ്റവും പുതിയ റിപ്പോർട്ടിൽ നാലാംസ്​ഥാനത്തേക്കു വീണു.

കുടി​വെള്ള കമ്പനി നോങ്​ഫു സ്​പ്രിങ്​ ഉടമ ഷോങ്​ ഷാൻഷാൻ, ടെൻസെന്‍റ്​ ഹോൾഡിങ്ങിന്‍റെ പോണി മാ, ഇ- കൊമേഴ്​സ്​ രംഗത്തെ പുതിയ സാന്നിധ്യമായ പിൻഡുവോഡോയുടെ മുതലാളി കോളിൻ ഹുവാങ്​ എന്നിവരാണ്​ ആദ്യ മൂന്നു പദവികളിലുള്ളവർ.

ജാക്​ മായുടെ ആന്‍റ്​ ഗ്രൂപിനും ആലിബാബക്കും മേൽ സർക്കാർ കടുത്ത നിയന്ത്രണങ്ങൾ ചുമത്തിയതോടെ ഇരു കമ്പനികളുടെയും വിപണി നിയന്ത്രണം താഴോട്ടാണ്​.

കഴിഞ്ഞ വർഷം ഒക്​ടോബറിൽ ജാക്​ മാ നടത്തിയ പ്രസംഗത്തോടെയാണ്​ അതിസമ്പന്നനും തന്‍റെ കമ്പനികൾക്കും ശനിദശ തുടങ്ങിയത്​. രാജ്യത്ത്​ ഭരണകൂടം നയിക്കുന്ന നിയന്ത്രണ സംവിധാനത്തിനെതിരെ അന്ന്​ അദ്ദേഹമ ആഞ്ഞടിച്ചിരുന്നു. 3700 കോടി ഡോളർ വിപണി മൂല്യമുള്ള ആന്‍റ്​ ഗ്രൂപ്​ ​പ്രഖ്യാപിച്ച ഐ.പി.ഒക്ക്​ വിലക്കേർപ്പെടുത്തിയായിരുന്നു ആദ്യ പ്രതികാരം. ആലിബാബക്കെതിരെ ഡിസംബറിൽ സർക്കാർ അന്വേഷണം പ്രഖ്യാപിച്ചു. ആന്‍റ്​ ഗ്രൂപിന്‍റെ ചില വ്യവസായങ്ങൾ നിർത്തലാക്കാൻ സർക്കാർ നിർദേശം നൽകുകയും ചെയ്​തു.

നടപടികൾ ഒന്നിനുപിറകെ ഒന്നായി അതിവേഗത്തിൽ വന്നുതുടങ്ങിയതോടെ പൊതുരംഗത്തുനിന്ന്​ പൂർണമായി ജാക്​ മാ വിട്ടുനിന്നത്​ അറസ്റ്റ്​ അഭ്യൂഹങ്ങളും ശക്​തമാക്കി. ജനുവരിയിൽ 50 സെക്കൻഡ്​ ദൈർഘ്യമുള്ള വിഡിയോ പുറത്തുവിട്ടായിരുന്നു തിരിച്ചുവരവ്​.

അതിനിടെ, നോങ്​ഫു സ്​പ്രിങ്​ കമ്പനിയുടെ ഓഹരികൾക്ക്​ വില കുത്തനെ ഉയർന്നതാണ്​്​്​്​്​്​്​്​്​്​്​്​്​്​്​്​്​ ഷോങ്ങിനെ ഒന്നാം നമ്പർ സമ്പന്നനാക്കിയത്​. അദ്ദേഹത്തിന്‍റെ തന്നെ ഉടമസ്​ഥതയിലുള്ള വാക്​സിൻ കമ്പനി ബെയ്​ജിങ്​ വാൻറ്റയ്​ ബയോളജിക്കൽ എന്‍റർപ്രൈസിനും ഓഹരി മൂല്യം ഉയർന്നിട്ടുണ്ട്​.

പബ്​ജി ഉൾപെടെ മൊബൈൽ ഗെയിമുകളും ടെക്​നോളജി മികവുമായി ആഗോള വിപണിയിൽ ശക്​തമായ സാന്നിധ്യമായ ടെൻസെൻറിന്​ കഴിഞ്ഞ ഒരു വർഷത്തിനിടെ മാത്രം കൂടിയത്​ 70 ശതമാനം സമ്പത്താണ്​. പിൻഡുവോഡോക്ക്​ മൂന്നിരട്ടിയോളമാണ്​ വർധന. ജാക്​ മാക്ക്​ പ​ക്ഷേ, ഇത്​ 22 ശതമാനം മാത്രം. ടിക്​ ടോക്​ ഉടമ ബൈറ്റ്​ ഡാൻസ്​ സ്​ഥാപകൻ ഷാങ്​ യിമിങ്​ അഞ്ചാം സ്​ഥാനത്തേക്കുയർന്നു.