ഒറ്റക്കാണോ? ഏകാന്തതക്ക്​ കൂട്ടായി മന്ത്രിയെ വെച്ച്​ ജപ്പാൻ

ടോകിയോ: പെരുവഴിയിലായ മനുഷ്യർക്ക്​ അത്താണിയാകാൻ ഓരോ രാജ്യത്തെയും സർക്കാറുകൾ പദ്ധതി പലതു പ്രഖ്യാപിക്കുന്നത്​ നാം കേൾക്കുന്നത്​ പതിവാണ്​​. പക്ഷേ, ഏകാന്തത മൂലം മനസ്സു തകർന്നുപോയവർ പെരുകുന്ന ജപ്പാനിൽ പുതിയതായി മന്ത്രിയെ പ്രഖ്യാപിച്ചതാണ്​ ഏറ്റവും പുതിയ വാർത്ത. ഷിൻസോ ആബെയുടെ പിൻഗാമിയായി എത്തിയ പ്രധാനമന്ത്രി യോഷിഹിദെ സുഗയാണ്​ ത​െൻറ മന്ത്രിസഭയിൽ ഏകാന്തർക്കും മ​ന്ത്രിയെ പ്രഖ്യാപിച്ചത്​. ചരിത്രത്തിലാദ്യമായി ബ്രിട്ടൻ 2018ൽ ഇങ്ങനെ ഒരു മന്ത്രി പദവി പ്രഖ്യാപിച്ചിരുന്നു. ഇത്​ മാതൃകയാക്കിയാണ്​ ടെറ്റ്​സുഷി സകാമോ​​ട്ടോക്ക്​ ചുമതല നൽകിയത്​.

ഏകാന്തത മൂലം മനംമരവിച്ച്​ ആത്​മഹത്യ ചെയ്യുന്നവരുടെ നിരക്ക്​ ജപ്പാനിൽ അതിദ്രുതം കൂടുകയാണ്​. ജനന നിരക്കും രാജ്യത്ത്​ ഞെട്ടിപ്പിക്കുന്ന നിരക്കിലാണ്​ കുറയുന്നത്​. ഇതുരണ്ടും പരിഹരിക്കുന്ന ചുമതലയാണ്​ സകാമോ​ട്ടോക്ക്​ നൽകിയിരിക്കുന്നത്​. കോവിഡ്​ മഹാമാരി കാലത്ത്​ ഏകാന്തത മൂലം ആത്​മഹത്യ തെരഞ്ഞെടുക്കുന്ന വനിതകളുടെ എണ്ണം കുത്തനെ കൂടുകയാണെന്ന്​ റിപ്പോർട്ടുകൾ പറയുന്നു.

സാമൂഹിക ജീവിതത്തെ അസ്വസ്​ഥമാക്കുന്ന ഏകാന്തത പരിഹരിക്കാനും ജനത്തിനിടയിലെ ബന്ധം രൂഢമാക്കാനും ഇതുവഴിയാകുമെന്ന്​ പ്രതീക്ഷിക്കുന്നതായി സകാമോ​ട്ടോ പറഞ്ഞു.

മന്ത്രിക്കു കീഴിൽ നടപടികൾ വേഗത്തിലാക്കാൻ പ്രത്യേക ഓഫീസും ജപ്പാൻ സർക്കാർ തുടങ്ങിയിട്ടുണ്ട്​. ആത്​മഹത്യ, കുട്ടികൾക്കിടയിലെ പട്ടിണി എന്നിവയും മന്ത്രിയുടെ പരിഗണനയിൽ വരും.

426,000 കോവിഡ്​ കേസുകളിൽ 7,577 പേരാണ്​ ഇതുവരെ രാജ്യത്ത്​ മരണം വരിച്ചതെന്ന്​ ജോൺ ഹോപ്​കിൻസ്​ യൂനിവേഴ്​സിറ്റി റിപ്പോർട്ട്​ പറയുന്നു.