28 ചൈനീസ്​ കമ്പനികളെ കൂടി കരിമ്പട്ടികയിൽ പെടുത്തി ബൈഡൻ

വാഷിങ്​ടൺ: ഡോണൾഡ്​ ട്രംപ്​ ഭരണത്തിലിരിക്കെ 31 ചൈനീസ്​ കമ്പനികൾക്ക്​ ഏ​ർപെടുത്തിയ ഉപരോധം വ്യാപിപ്പിച്ച്​ പുതിയ പ്രസിഡന്‍റ്​ ജോ ബൈഡൻ. പുതുതായി 28 ചൈനീസ്​ കമ്പനികളിൽ അമേരിക്കൻ കമ്പനികൾക്കും വ്യക്​തികൾക്കും നിക്ഷേപമിറക്കുന്നതിനാണ്​​ വിലക്ക്​. ഇവ ചൈനയുടെ സൈനിക വ്യവസായ മേഖലയിൽ പ്രവർത്തിക്കുന്നവയാണെന്നാണ്​ വിശദീകരണം.

നേരത്തെ, ട്രംപ്​ വില​ക്കേർപെടുത്തിയപ്പോഴും സമാന കാരണമാണ്​ ഉന്നയിച്ചിരുന്നത്​. മുൻനിര ടെലികോം, നിർമാണ, സാ​ങ്കേതിക സ്​ഥാപനങ്ങളായ ചൈന മൊബൈൽ, ചൈന ടെലികോം, വിഡിയോ സർവയലൻസ്​ കമ്പനി ഹിക്​വിഷൻ, ചൈന റെയിൽവേ കൺസ്​ട്രക്​ഷൻ കോർപ്​ തുടങ്ങിയവക്കായിരുന്നു ട്രംപ്​ അമേരിക്കയിൽ പൂട്ടിട്ടത്​. ഇതിലുൾപെടുത്തിയിരുന്ന ഏവിയേഷൻ ഇൻഡസ്​ട്രി കോർപ്​ ഓഫ്​ ചൈന, ചൈന മൊബൈൽ കമ്യൂണിക്കേഷൻസ്​ ഗ്രൂപ്​, ചൈന നാഷനൽ ഓഫ്​ഷോർ ഓയിൽ കോർപ്​, വാവയ്​ ടെക്​നോളജീസ്​ ആന്‍റ്​ സെമികണ്ടക്​ടർ മാനുഫാക്​ചറിങ്​ ഇന്‍റർനാഷനൽ കോർപ്​ (എസ്​.എം.ഐ.സി) തുടങ്ങിയവ പുതിയ പട്ടികയിലും ഇടംപിടിച്ചിട്ടുണ്ട്​. ചിപ്​ നിർമാണ മേഖലയിൽ ആഗോള തലത്തിൽ ഏറ്റവും പ്രശസ്​തമായ കമ്പനികളി​െലാന്നാണ്​ എസ്​.എം.ഐ.സി.

ചൈനയുമായി നയതന്ത്ര ചർച്ചകൾ പുനരാരംഭിച്ച ബൈഡൻ ഭരണകൂടം പ്രതിരോധ, സാ​ങ്കേതിക രംഗങ്ങളിൽ നിയന്ത്രണം കടുപ്പിക്കുമെന്ന്​ നേരത്തെ പ്രഖ്യാപിച്ചിരുന്നു. ഇതിന്‍റെ ഭാഗമായാണ്​ പുതിയ കമ്പനികൾ കൂടി ഉപരോധ പട്ടികയിൽ പെടുത്തിയത്​. ഈ മേഖലയിൽ നേരത്തെ നിക്ഷേപമുള്ളവർക്ക്​ അവ പിൻവലിക്കാൻ സാവകാശം നൽകും. പുതിയ നിയന്ത്രണങ്ങൾക്കെത​ിരെ ചൈന കടുത്ത വിമർശനവുമായി രംഗത്തെത്തിയിട്ടുണ്ട്​.

അതേ സമയം, വിമാന നിർമാണ രംഗത്തെ ആഗോള ഭീമന്മാരായ ബോയിങ്​, എയർബസ്​ എന്നിവയോട്​ കൊമ്പുകോർക്കാൻ ചൈന രൂപം നൽകിയ കൊമേഴ്​സ്യൽ എയർക്രാഫ്​റ്റ്​ കോർപ്​ ഓഫ്​ ചൈന വിലക്കപ്പെട്ടിട്ടില്ല. യു.എസ്​ വിലക്കിനെതിരെ നേരത്തെ കോടതി കയറിയ ഗോവിൻ സെമികണ്ടക്​ടർ കോർപ്​, ലുവോകോങ്​ ടെക്​നോളജി കോർപ്​ എന്നിവയും ഇടംനേടാതെ ഒഴിവായി. ട്രംപ്​ നേരത്തെ വിലക്കുകയും പിന്നീട്​ ഒഴിവാക്കുകകയും ചെയ്​ത ​ഷഓമിയും പട്ടികയിലില്ലെന്നത്​ ശ്രദ്ധേയമാണ്​.