അമേരിക്കൻ പൗരാവകാശ സമര നായകൻ ജോൺ ലൂയിസ്​ അന്തരിച്ചു

അറ്റ്​ലാൻറ: അമേരിക്കയിൽ കറുത്തവരുടെ തുല്യതക്കും പൗരാവകാശങ്ങൾക്കും വേണ്ടി ജീവിതം മാറ്റിവെച്ച ജോൺ ലൂയിസ്​​ (80) അന്തരിച്ചു. മാർട്ടിൻ ലൂതർ കിങ്​ ജൂനിയർക്കൊപ്പം 1960കളുടെ തുടക്കത്തിൽ നടന്ന പൗരാവകാശ പ്രക്ഷോഭത്തി​​െൻറ നേതാക്കളിൽ ജീവിച്ചിരിക്കുന്ന അവസാനത്തെ ആളായിരുന്നു ലൂയിസ്​​. 18ാം വയസ്സിലാണ്​ സമരങ്ങളുടെ ഭാഗമാകുന്നത്​. 

പൗരാവകാശ പ്രക്ഷോഭങ്ങൾക്കിടെ പൊലീസി​​െൻറ കടുത്ത മർദനത്തിനും ഇരയായി. ത​ലയോട്ടി അടിച്ചുപൊട്ടിച്ചു. ഇൗ സമരങ്ങളിലൂടെയാണ്​ അമേരിക്കയിൽ കറുത്തവർക്ക്​ ഉപാധികളില്ലാതെയുള്ള വോട്ടവകാശം ലഭ്യമായത്​. 1986ൽ അമേരിക്കൻ കോൺഗ്രസിലേക്ക്​ തെരഞ്ഞെടുക്കപ്പെട്ടു. 2019ൽ അർബുദം ബാധിച്ചിട്ടും ഇൗ പോരാളി തളർന്നില്ല. ജോർജ്​ ​ഫ്ലോയ്​ഡിനെ പൊലീസ്​ കൊലപ്പെടുത്തിയതിനെതിരെ നടന്ന പ്രക്ഷോഭങ്ങളുടെ ഭാഗമായി ജൂണിലും സമര രംഗത്തിറങ്ങിയിരുന്നു. 

ലൂയിസ്​​ മരണപ്പെടുന്നതിന്​ മണിക്കൂറുകൾ മുമ്പ്​ പൗരാവകാശ പ്രക്ഷോഭത്തിൽ നായകത്വം വഹിച്ച റവ. കോർഡി ടി​ൻഡെൽ വിവിയൻ (95) മരണപ്പെട്ടിരുന്നു. 1947ൽ ഇല്ലിനോയ്​സിൽ തുല്യാവകാശത്തിനായി സമാധാനപരമായി സമരം ചെയ്​താണ്​ ടിൻഡെൽ വിവിയൻ പ്രക്ഷോഭ രംഗത്തെത്തിയത്​. വംശീയതക്കെതിരെ പോരാടിയതി​​െൻറ പേരിൽ കലാലയങ്ങളിൽ നിന്ന്​ പുറത്താക്കപ്പെട്ടവർക്കായി കോളജ്​ ആരംഭിക്കുകയും ചെയ്​തിരുന്നു.