വിക്കിലീക്​സ്​ സ്​ഥാപകൻ ജൂലിയൻ അസാൻജിന്‍റെ എക്വഡോർ പൗരത്വം പിൻവലിച്ചു

ലണ്ടൻ: നിർണായക​ ചോർത്തലുകളുമായി ലോകത്തുടനീളം ഭരണകൂടങ്ങളെ മുൾമുനയിലാക്കിയ വിക്കീലീക്​സ് സ്​ഥാപകൻ ജൂലിയൻ അസാൻജിന് നൽകിയ പൗരത്വം എക്വഡോർ പിൻവലിച്ചു. ബ്രിട്ടീഷ്​ തടവറയിൽ കഴിയുന്ന അസാൻജ്​ യഥാർഥ രേഖകൾ മറച്ചുവെച്ച്​ വ്യാജ തെളിവുകൾ നൽകിയെന്ന്​ ആരോപിച്ചാണ്​ നടപടി. തെറ്റുകളേറെയാണെന്നതിന്​ പുറമെ ഒന്നിലേറെ ഒപ്പുകളും രേഖകളിലുണ്ടെന്ന്​ എക്വഡോർ സർക്കാർ പറ്യുന്നു. എന്നാൽ, വിശദീകരണം നൽകാൻ അവസരം നൽകാതെയാണ്​ നടപടിയെന്ന്​ അസാൻജിന്‍റെ അഭിഭാഷകൻ കാർലോസ്​ പൊവീദ പറഞ്ഞു.

ലണ്ടനിലെ എക്വഡോർ എംബസിയിൽ അഭയം തേടിയ ആസ്​ട്രേലിയൻ വംശജനെ രക്ഷപ്പെടുത്താൻ 2018ലാണ്​ പൗരത്വം നൽകിയത്​. നയതന്ത്രപ്രതിനിധിയായി പ്രഖ്യാപിക്കുന്നതിനായിരുന്നു പൗരത്വം നൽകൽ. എന്നാൽ, വിഷയം പരിഗണിച്ച കോടതി പൗരത്വം റദ്ദാക്കുകയായിരുന്നു.

വിക്കീലീക്​സ്​ വെളിപ്പെടുത്തലുകളുടെ തുടർച്ചയായി വന്ന നിരവധി കേസുകളിൽ 2019 ഏപ്രിലിൽ അസാൻജിനെ ബ്രിട്ടീഷ്​ പൊലീസ്​ അറസ്റ്റ്​ ചെയ്​ത്​ ബെൽമാർഷ്​ കോടതിയി​ലടച്ചിരുന്നു. ഏഴു വർഷമാണ്​ അദ്ദേഹം ലണ്ടനിലെ എക്വഡോർ എംബസിയിൽ കഴിഞ്ഞിരുന്നത്​.

അമേരിക്കയിൽ അസാൻജിനെതിരെ 17 ചാരവൃത്തി കേസുകൾ നിലനിൽക്കുന്നുണ്ട്​. സൈനിക, നയതന്ത്ര രഹസ്യങ്ങൾ ചോർത്താൻ കമ്പ്യൂട്ടർ ദുരുപയോഗം ചെയ്​തതിന്​ വേറെയും കേസുണ്ട്​. 175 വർഷം വരെ തടവു ശിക്ഷ ലഭിക്കാവുന്നതാണ്​ കേസ്​.

പൗരത്വം റദ്ദാക്കപ്പെട്ടതോടെ അസാൻജിനെ അമേരിക്കക്ക്​ വിചാരണക്കായി കൈമാറിയേക്കും. കഴിഞ്ഞ ജനുവരിയിൽ അമേരിക്ക നൽകിയ നാടുകടത്തൽ അപേക്ഷ കോടതി തള്ളിയിരുന്നു.