അഫ്​ഗാനിലേത്​ ഏറ്റവും ദുഷ്​കരമായ ഒഴിപ്പിക്കൽ ദൗത്യമെന്ന് ജോ ബൈഡൻ

വാഷിങ്​ടൺ: അഫ്​ഗാനിസ്​താനിലെ കാബൂൾ വിമാനത്താവളം വഴിയുള്ള ഒഴിപ്പിക്കലിന്‍റെ അന്തിമ ഫലം എന്താണെന്ന്​ ഇപ്പോൾ പറയാൻ കഴിയില്ലെന്നും ചരിത്രത്തിലെ ഏറ്റവും വിഷമകരമായ ഒഴിപ്പിക്കൽ ദൗത്യങ്ങളിലൊന്നാണ്​ ഇതെന്നും അമേരിക്കൻ പ്രസിഡൻറ്​ ജോ ബൈഡൻ. അഫ്​ഗാനിൽ താലിബാൻ ഭരണം പിടിച്ചതിനു ശേഷമുള്ള സാഹചര്യം വിശദീകരിക്കാൻ വിളിച്ചുചേർത്ത വാർത്തസമ്മേളനത്തിലാണ്​ ബൈഡൻ ഇക്കാര്യം പറഞ്ഞത്​.

''ചരിത്രത്തിലെ തന്നെ ഏറ്റവും വിപുലമായതും ബുദ്ധിമു​ട്ടേറിയതുമായ ഒഴിപ്പിക്കലുകളിൽ ഒന്നാണിത്​. അന്തിമ ഫലം എന്താ​ണെന്ന്​ പ്രവചിക്കാൻ ഇപ്പോൾ കഴിയില്ല.'' -യു.എസ്​ പ്രസിഡൻറ്​ വിശദീകരിച്ചു. അഫ്​ഗാനിസ്​താനിലെ മുഴുവൻ അമേരിക്കക്കാരെയും നാട്ടിലെത്തിക്കുമെന്നും താലിബാനുമായി നിരന്തരം ബന്ധപ്പെട്ടു വരുകയാണെന്നും യു.എസ്​ പൗരന്മാർക്ക്​ കാബൂൾ വിമാനത്താവളത്തിൽ എത്തുന്നതിൽ തടസ്സങ്ങളുണ്ടാകരുതെന്ന കാര്യത്തിൽ താലിബാനുമായി കരാർ ഉണ്ടാക്കിയിട്ടുണ്ടെന്നും അദ്ദേഹം പറഞ്ഞു.

വിമാനത്താവളവുമായി ബന്ധപ്പെട്ട്​ ഭീകരാക്രമണമുണ്ടാവാനുള്ള സാധ്യത മുന്നിൽക്കണ്ട്​ കനത്ത ജാഗ്രത പുലർത്തുന്നുണ്ടെന്നും ബൈഡൻ വ്യക്​തമാക്കി. അഫ്​ഗാനിൽ നിന്നുള്ള പിന്മാറ്റ തീരുമാനം അമേരിക്കയുടെ വിശ്വാസ്യതക്ക്​ മങ്ങലേൽപിച്ചോ എന്ന ചോദ്യത്തിന്​, തങ്ങളുടെ വിശ്വാസ്യത എവിടെയും ചോദ്യം ​ചെയ്യപ്പെട്ടിട്ടില്ല എന്നായിരുന്നു അദ്ദേഹത്തിന്‍റെ മറുപടി.