ശതകോടികളുടെ ബിറ്റ്​കോയിൻ 'ശേഖരം' ചവറുകൂനയിൽ; കുഴിക്കാൻ അനുവദിച്ചാൽ 500 കോടി വാഗ്​ദാനവുമായി യുവാവ്​

ലണ്ടൻ: ശതകോടികൾ മൂല്യമുള്ള 7,500 ബിറ്റ്​കോയിനുകളുടെ ഡിജിറ്റൽ ശേഖരം സൂക്ഷിച്ച കമ്പ്യൂട്ടർ ഹാർഡ്​ ഡ്രൈവ്​ അശ്രദ്ധമായി ചവറുകൂനയിലെറിഞ്ഞ യുവാവിന്​ കിട്ടിയത്​ 'എട്ടിന്‍റെ പണി'. വർഷങ്ങൾക്ക്​ മുമ്പ്​ അത്ര മൂല്യമില്ലാത്ത ​കാലത്ത്​ വാങ്ങിക്കൂട്ടിയ ബിറ്റ്​കോയിനുകൾ, വെയിൽസുകാരൻ ജെയിംസ്​ ഹോവെൽസാണ്​ അശ്രദ്ധമായി മുനിസിപ്പാലിറ്റി ചവറുകൂനയിൽ കളഞ്ഞത്​.

2013ൽ ദൂരെകളഞ്ഞ ബിറ്റ്​കോയിനുകൾക്ക്​ പിന്നീട്​ വില ആകാശത്തോളമുയർന്നപ്പോൾ​ അവക്കായി തിരച്ചിൽ തുടങ്ങുകയായിരുന്നു. ​നീണ്ട തിരച്ചിലിലും എവിടെയും ലഭിക്കാതെ വന്നതോടെ പഴക്കം ചെന്ന ഹാർഡ്​ ഡ്രൈവ്​ മറ്റു സാധനങ്ങൾക്കൊപ്പം വർഷങ്ങൾക്ക്​ മുമ്പ്​ കളഞ്ഞത്​ ഓർമ വന്നു.

ഇതോടെ​ എന്തുവില കൊടുത്തും അവ കൈക്കലാക്കാൻ ശ്രമവ​ും തുടങ്ങി​. വെയിൽസിലെ ന്യൂപോർട്ട്​ സിറ്റി കൗൺസിലിനു കീഴിലെ മാലിന്യക്കൂനയിൽ ഹാർഡ്​ ഡ്രൈവ്​ ഇപ്പോഴും ഇരിക്കുന്നുണ്ടാകാമെന്ന നിഗമനത്തിൽ അധികൃതരെ സമീപിച്ച ജെയിംസ്​ വാഗ്​ദാനം​ ചെയ്​തത്​ ബിറ്റ്​കോയിൻ ശേഖരത്തിന്‍റെ നാലിലൊന്നാണ്​. ഹാർഡ്​ ഡ്രൈവ്​ ഉണ്ടാകാൻ സാധ്യതയുള്ള ഭാഗം കുഴിക്കാൻ അനുവദിക്കണമെന്നാണ്​ അപേക്ഷ. 500 കോടിയിലേറെ രൂപ അതിനു മാത്രം മൂല്യംവരും.

2009ലാണ്​ ബി​റ്റ്​​േകായിൻ എന്ന ഡിജിറ്റൽ കറൻസി, സതോഷി നകാമോ​ട്ടോ എന്നുമാത്രം ലോകത്തിന്​ അറിയുന്നയാൾ വികസിപ്പിച്ചത്​. ഓരോ വ്യക്​തിയുടെയും സാ​ങ്കേതിക ഉപകരണങ്ങളുടെ ഡിജിറ്റൽ വാലറ്റിൽ സൂക്ഷിച്ച കമ്പ്യൂട്ടർ ഫയലുകളാണ്​ ബിറ്റ്​കോയിനുകൾ. അവ പിന്നീട്​ പണം കൈമാറ്റത്തിനുൾപെടെ ഉപയോഗിക്കാം.

നിലവിൽ ഒരു ബിറ്റ്​കോയിൻ 37,000 ഡോളറിനാണ്​ വിൽപന നടക്കുന്നത്​. എന്നുവെച്ചാൽ, 7500 ബിറ്റ്​കോയിനുകൾക്ക്​ വരുന്ന മൂല്യം ഹോവൽസിന്‍റെ സ്വപ്​നങ്ങൾക്കും എത്രയോ മേലെയാണ്​.

തന്‍റെ ബിറ്റ്​കോയിനുകൾക്ക്​ 90 ലക്ഷം ഡോളർ മൂല്യമുള്ള കാലത്തായിരുന്നു ഹാർഡ്​ ഡ്രൈവ്​ കാണാനില്ലെന്ന വിവരം ആദ്യമായി യുവാവ്​ മനസ്സിലാക്കുന്നു. നിലവിലെ മൂല്യം കണക്കാക്കിയാൽ ഇവക്ക്​ 273 ദശലക്ഷം ഡോളർ വരും.

2013 മുതൽ ഇയാൾ പിന്നാലെയുണ്ടെന്ന്​ ന്യൂപോർട്ട്​ സിറ്റി കൗൺസിൽ അധികൃതർ പറയുന്നു. ഒറ്റക്ക്​ കുഴിക്കൽ അസാധ്യമാക്കുന്നത്ര വലിയതാണ്​ മാലിന്യശേഖരം. അപേക്ഷ തള്ളിയി​ട്ടില്ലെങ്കിലും നിലവിൽ കുഴിക്കൽ അനുമതിയില്ലാത്തതാണ്​ ഈ സ്​ഥലമെന്നാണ്​ അധികൃതരുടെ വിശദീകരണം. പരിസ്​ഥിതി പ്രശ്​നമാണ്​ പ്രധാന വില്ലൻ.

നിലവിലെ സാഹചര്യത്തിൽ, ഒരു നിമിഷത്തെ അശ്രദ്ധക്ക്​ ആയുസ്സ്​ മുഴുവൻ കരഞ്ഞുതീർക്കാനാകും ജെയിംസ്​ ഹോവൽസിന്‍റെ വിധി.