മൗറീഷ്യസ്​ എണ്ണക്കപ്പൽ ദുരന്തം; ഇന്ത്യക്കാരനായ ക്യാപ്​റ്റൻ​ അറസ്​റ്റിൽ

മൗറീഷ്യസ്​ എണ്ണക്കപ്പൽ ദുരന്തം; ഇന്ത്യക്കാരനായ ക്യാപ്​റ്റൻ​ അറസ്​റ്റിൽപോർട്ട് ലൂയിസ്: മൗറീഷ്യസ് തീരത്ത് പവിഴപ്പുറ്റിലിടിച്ച് ജപ്പാനീസ്​ എണ്ണക്കപ്പൽ തകർന്ന്​ വൻതോതിൽ എണ്ണ ചോർന്ന സംഭവത്തിൽ കപ്പലിലെ ക്യാപ്റ്റനും ഡെപ്യൂട്ടിയും അറസ്റ്റിൽ. ഇന്ത്യൻ പൗരനായ ക്യാപ്റ്റൻ സുനിൽ കുമാർ നന്ദേശ്വറിനേയും ഡെപ്യൂട്ടി ക്യാപ്​റ്റനായ ശ്രീലങ്കൻ പൗരനെയുമാണ് മൗറീഷ്യൻ പൊലീസ് അറസ്റ്റ് ചെയ്തത്.

ഇരുവരേയും ഓഗസ്റ്റ് 25ന് കോടതിയിൽ ഹാജരാക്കും. കപ്പലിലെ മറ്റുജീവനക്കാരെ ചോദ്യംചെയ്​തുകൊണ്ടിരിക്കുകയാണെന്നും അപകടത്തിൽ വിശദമായ അന്വേഷണം തുടരുമെന്നും മൗറീഷ്യസ് പൊലീസ്​ വക്താവ്​ അറിയിച്ചു.

ജപ്പാ​െൻറ ഉടമസ്ഥതയിലുള്ള എംവി വകാഷിയോ എന്ന കപ്പൽ സിങ്കപ്പൂരിൽ നിന്ന് ബ്രസീലിലേക്കുള്ള യാത്രക്കിടെ ജൂലായ് 25നാണ് മൗറീഷ്യൻ തീരത്ത് പവിഴപ്പുറ്റിലിടിച്ചത്. നാലായിരം ടൺ ഇന്ധനമാണ് കപ്പലിലുണ്ടായിരുന്നത്. കപ്പൽ ിടിച്ചതിനെ തുടർന്ന്​ 1000 ടൺ എണ്ണയാണ്​ കടലിൽ ഒഴ​ുകിയത്​. കപ്പലിൽ നിന്ന് മൂവായിരത്തോളം ടൺ എണ്ണ പമ്പ് ചെയ്ത് മാറ്റിയിരുന്നു. തിരമാലയുടെ ശക്തിയിൽ ദിവസങ്ങൾക്ക് മുമ്പ് കപ്പൽ രണ്ടായി പിളരുകയും ചെയ്തു.

സിങ്കപ്പൂരിൽ നിന്ന് ബ്രസീലിലേക്ക് പോകുകയായിരുന്ന കപ്പൽ എന്തിനാണ് ദ്വീപിനോട് ഇത്ര അടുത്ത് വന്നതെന്ന് അധികൃതർ ഇതുവരെ വെളിപ്പെടുത്തിയിട്ടില്ല. ദ്വീപിനോട്​ ചേർന്ന്​ പവിഴപ്പുറ്റുകൾ നിറഞ്ഞ ഭാഗത്ത്​ എണ്ണ ചോർന്നത്​ വൻ പാരിസ്ഥിതിക ദുരന്തമാണ്​ ഉണ്ടാക്കിയതെന്ന്​ മൗറീഷ്യസ്​ സർക്കാർ വാദിക്കുന്നത്​. പവിഴപ്പുറ്റുകൾ നിറഞ്ഞ മൗറീഷ്യസ്​ തീരം സഞ്ചാരികളുടെ പ്രിയപ്പെട്ട ഇടമാണ്​. കപ്പലി​െൻറ എഞ്ചിൻ റൂം ഉൾപ്പെടുന്ന ഭാഗം പവിഴപ്പുറ്റിനെ ഇടിച്ച് നിൽക്കുന്ന രീതിയിലാണ്​.