ഒമിക്രോൺ പ്രതിരോധത്തിന്​ നൈറ്റ്​ കർഫ്യു പ്രതിവിധിയല്ലെന്ന്​ ലോകാരോഗ്യ സംഘടന മുഖ്യ ശാസ്ത്രജ്ഞ

ന്യൂഡൽഹി: കോവിഡിന്‍റെ ഒമിക്രോൺ വകഭേദത്തെ പ്രതിരോധിക്കാൻ ശാസ്ത്രീയമായ സമീപനങ്ങൾ രാജ്യങ്ങൾ സ്വീകരിക്കണമെന്ന്​ ലോകാരോഗ്യസംഘടന മുഖ്യ ശാസ്ത്രജ്ഞ സൗമ്യ സ്വാമിനാഥൻ. രാത്രി കർഫ്യു എന്നത്​ ശാസ്ത്രീയമായ സമീപനമല്ലെന്നും അതിന്‍റെ ഫലപ്രാപ്തി ഇതുവരെ തെളിയിക്കപ്പെട്ടിട്ടില്ലെന്നും അവർ പറഞ്ഞു. സി.എൻ.ബി.സി-ടി.വി 18ക്ക്​ നൽകിയ അഭിമുഖത്തിലാണ്​ അവരുടെ പരാമർശം.

നമ്മൾ ജാഗ്രത പുലർത്തേണ്ട സമയമാണ്​. ഒരിക്കലും പരി​​ഭ്രാന്തരാകരുത്​. ഇന്ത്യയിൽ ഒമിക്രോൺ കേസുകളുടെ വർധന പ്രതീക്ഷിക്കാം. ഇത്​ തുടക്കം മാത്രമാണ്​ പല നഗരങ്ങളിലും കോവിഡിന്‍റെ വ്യാപനം ഇനിയും ഉണ്ടായേക്കാം. ഒമിക്രോണുമായി ബന്ധപ്പെട്ട്​ രാജ്യങ്ങൾ സാഹചര്യങ്ങൾ വിലയിരുത്തണം. കോവിഡ്​ ബാധിച്ച്​ മരിച്ചവർ ഏത്​ വാക്സിനാണ്​ സ്വീകരിച്ചതെന്ന്​ പരിശോധിക്കണം. എത്രകാലം മുമ്പ്​ അവർ വാക്സിൻ സ്വീകരിച്ചുവെന്നതും നോക്കണം.ബൂസ്റ്റർ ഡോസ്​ നൽകേണ്ടത്​ ഏത്​ വിഭാഗത്തിനാണെന്നും അതാത്​ രാജ്യങ്ങൾ തീരുമാനിക്കണം.

നിലവിൽ ജനങ്ങൾക്ക്​ നൽകിയിരിക്കുന്ന വാക്സിനുകളുടെ ആന്‍റിബോഡിയുടെ ശേഷി ആറ്​ മാസം കഴിയുമ്പോൾ കുറയുമെന്നാണ്​ കണക്കാക്കുന്നതെന്നും അവർ പറഞ്ഞു. രോഗം ഏറ്റവും കൂടുതൽ ബാധിക്കാൻ സാധ്യതയുള്ള വിഭാഗത്തിന് ബൂസ്റ്റർ ഡോസ്​​ വാക്സിൻ നൽകണമെന്നാണ്​ ലോകാരോഗ്യസംഘടനയുടെ നിലപാട്​. എല്ലാ വിഭാഗം ജനങ്ങൾക്ക്​ വാക്സിൻ നൽകണമെന്നത്​ സംബന്ധിച്ച്​ പഠനഫലങ്ങളൊന്നും പുറത്ത്​ വന്നിട്ടില്ല.

ഒമിക്രോൺ തടയാനുള്ള നിയന്ത്രണങ്ങൾ ഏർപ്പെടുത്തുമ്പോൾ രോഗബാധ തടയുന്നതിനൊപ്പം സമ്പദ്​വ്യവസ്ഥയേയും പരിഗണിക്കണം. കോവിഡ്​ കേസുകൾ കൂടുമ്പോൾ ആദ്യം സ്കൂളുകൾ അടക്കുകയെന്ന സമീപനം ശരിയല്ല. നിയന്ത്രണം ഏർപ്പെടുത്തുമ്പോൾ അവസാനം അടക്കേണ്ടത്​ സ്കൂളുകളാ​ണ്​. സ്കൂളുകൾ ആദ്യം അടച്ചാൽ അത്​ കുട്ടികളുടെ വിദ്യാഭ്യാസത്തെ ഗുരുതരമായി ബാധിക്കുമെന്നും അവർ പറഞ്ഞു. ബൂസ്റ്റർ ഡോസിന്​ വ്യത്യസ്ത വാക്സിൻ തെരഞ്ഞെടുക്കുന്നത്​ ഗുണം ചെയ്യുമെന്നും ഡോ.സൗമ്യ സ്വാമിനാഥൻ കൂട്ടിച്ചേർത്തു.