കാബൂളിൽ വീണ്ടും ഭീകരാക്രമണമുണ്ടായേക്കാമെന്ന്​ യു.എസ്​ മുന്നറിയിപ്പ്​

വാഷിങ്​ടൺ: കാബൂളിൽ വീണ്ടും ഭീകരാക്രമണമുണ്ടായേക്കാമെന്ന മുന്നറിയിപ്പുമായി അമേരിക്ക. പ്രസിഡൻറ്​ ജോ ബൈഡനും വൈസ്​ പ്രസിഡൻറ്​ കമല ഹാരിസുമാണ്​ ഇതുസംബന്ധിച്ച മുന്നറിയിപ്പ്​ നൽകിയതെന്ന്​ വൈറ്റ്​ ഹൗസ്​ പ്രസ്​ സെക്രട്ടറി ജെൻ പസ്​കി പറഞ്ഞു. കാബൂളിലെ സുരക്ഷാദൗത്യത്തിൽ ജാഗ്രത പുലർത്തണമെന്ന്​ ഇരുവരും നിർദേശിച്ചു.

വരും ദിവസങ്ങളിൽ അമേരിക്കയുടെ കാബൂൾ ഒഴിപ്പിക്കൽ ദുഷ്​കരമാകാനാണ്​ സാധ്യത. ഏറ്റവും നല്ല സുരക്ഷ കാബൂളിൽ ഒരുക്കാൻ ശ്രദ്ധിക്കുന്നുണ്ട്​. ആയിരക്കണക്കിനാളുകളെ പ്രതിദിനം അഫ്​ഗാനിൽ നിന്ന്​ വ്യോമമാർഗം യു.എസ്​ പുറത്തെത്തിക്കുന്നുണ്ടെന്നും പ്രസ്​ സെക്രട്ടറി പറഞ്ഞു. എത്രയും പെ​ട്ടെന്ന്​ മുഴുവൻ യു.എസ്​ പൗരൻമാരേയും അഫ്​ഗാനിൽ നിന്ന്​ പുറത്തെത്തിക്കുകയാണ്​ ലക്ഷ്യമെന്നും അദ്ദേഹം കൂട്ടിച്ചേർത്തു.

എയർപോർട്ട്​ ഗേറ്റുകളിൽ നിന്ന്​ മാറിനിൽക്കാൻ പൗരൻമാരോട്​ യു.എസ്​ നിർദേശിച്ചിട്ടുണ്ട്​. വിമാനത്താവളത്തിലേക്കുള്ള യാത്ര ഒഴിവാക്കാനും നിർദേശമുണ്ട്​. ഭീകരാക്രമണമുണ്ടാവാനുള്ള സാധ്യത മുന്നിൽകണ്ടാണ്​ പൗരൻമാർക്ക്​ യു.എസ്​ വീണ്ടും മുന്നറിയിപ്പ്​ നൽകിയത്​. നിലവിൽ 12ഓളം യു.എസ്​ വിമാനങ്ങളാണ്​ കാബൂളിൽ രക്ഷാപ്രവർത്തനം നടത്തുന്നത്​. നേരത്തെ കാബൂളിൽ ഐ.എസ്​ നടത്തിയ ഭീകരാക്രമണത്തിൽ കുട്ടികൾ ഉൾപ്പടെ 100ലധികം ആളുകൾ കൊല്ലപ്പെട്ടിരുന്നു. 13ഓളം യു.എസ്​ സൈനികർക്കും ആക്രമണത്തിൽ ജീവൻ നഷ്​ടമായിരുന്നു.