രണ്ടാം ദിവസവും സംഘർഷഭൂമിയായി മസ്​ജിദുൽ അഖ്​സ; 60ലേറെ പേർക്ക്​ പരിക്ക്​

​ജറൂസലം: അധിനിവേശം വ്യാപിപ്പിക്കാനുള്ള ഗൂഢ ശ്രമത്തിനെതിരെ മസ്​ജിദുൽ അഖ്​സയിൽ പ്രതിഷേധവുമായി സംഘടിച്ച ഫലസ്​തീനികൾക്കുനേരെ രണ്ടാം ദിനവും ഇസ്രായേൽ പൊലീസ്​ അതിക്രമം. റമദാനിലെ 27ാം രാത്രിയിൽ പള്ളിയിൽ തടിച്ചുകൂടിയവർക്കു നേരെയുണ്ടായ പോലീസ്​ ആക്രമണങ്ങളിൽ 60ലേറെ പേർക്ക്​ പരിക്കേറ്റു.

മസ്​ജിദുൽ അഖ്​സ സ്​ഥിതി ചെയ്യുന്ന ജറൂസലം പഴയ പട്ടണം ഉപരോധിച്ച്​ പൊലീസ്​ ഒരുക്കിയ ബാരിക്കേഡുകൾ തകർത്ത പ്രതിഷേധക്കാർക്കു നേരെ ഇസ്രായേൽ സുരക്ഷാസേന ജല പീരങ്കിയും സ്റ്റൺ ഗ്രനേഡുകളു​ം പ്രയോഗിച്ചു. 64 പേർക്ക്​ പരിക്കേറ്റതായി ഫലസ്​തീൻ റെഡ്​ ക്രസന്‍റ്​ അറിയിച്ചു. ഒരു ഓഫീസർക്ക്​ പരിക്കേറ്റതായി ഇസ്രായേൽ പൊലീസും അറിയിച്ചു. കഴിഞ്ഞ ദിവസം മസ്​ജിദുൽ അഖ്​സയിൽ ഇരച്ചുകയറിയ ഇസ്രായേൽ സേന നടത്തിയ അതിക്രമങ്ങളിൽ 200ലേറെ പേർക്ക്​ പരിക്കേറ്റിരുന്നു.

കിഴക്കൻ ജറൂസലം സമ്പൂർണമായി ജൂത കുടിയേറ്റ ഭൂമിയാക്കുന്നതിന്‍റെ ഭാഗമായി ഇവിടെയുള്ള നാട്ടുകാരായ ഫലസ്​തീനി താമസക്കാരെ കുടിയിറക്കുന്നതിനെതിരെയാണ്​ പ്രക്ഷോഭം ശക്​തമാക്കിയത്​. മസ്​ജിദിന്​ ഒരു കിലോമീറ്റർ പരിധിയിലുള്ള ശൈഖ്​ ജർറാഹ്​ പ്രദേശത്താണ്​ കൂട്ട കുടിയിറക്കൽ. ഇവിടെയുള്ള താമസക്കാർക്ക്​ ഐക്യദാർഢ്യമറിയിച്ച്​ ഫലസ്​തീനികൾ വ്യാപകമായി സംഘടിച്ചിരുന്നു. വെള്ളിയാഴ്​ച രാത്രി നമസ്​കാരത്തിനിടെയുണ്ടായ സംഘട്ടനങ്ങളിൽ 205 ഫലസ്​തീനികൾക്കാണ്​ പരിക്കേറ്റത്​.