പുതിയ ഭൂ അതിർത്തി നിയമം നിലവിലെ അതിർത്തി കരാറിനെ ബാധിക്കില്ല –ചൈന

ബെയ്​ജിങ്​: അതിർത്തി സംരക്ഷണത്തിനായി പുതുതായി പാസാക്കിയ ഭൂ അതിർത്തി നിയമം നിലവിലെ അതിർത്തി കരാറുകളെ ബാധിക്കില്ലെന്നും ഇതെ കുറിച്ച്​ മറ്റ്​ രാജ്യങ്ങൾക്ക്​ ആശങ്ക വേണ്ടെന്നും ചൈന. ഇന്ത്യയുടെ ആശങ്കകൾക്കാണ്​ ചൈനീസ്​ വിദേശകാര്യ മന്ത്രാലയ വക്​താവ്​ വാങ്​ വെൻബി​െൻറ മറുപടി​.

ഈ മാസം 23നാണ്​ നാഷനൽ പീപ്​ൾസ്​ കോൺഗ്രസ്​ പുതിയ ഭൂ അതിർത്തി നിയമം പാസാക്കിയത്​. കിഴക്കൻ ലഡാക്കിലെ അതിർത്തി സംബന്ധിച്ച്​ ഇന്ത്യയും ചൈനയും തമ്മിൽ തർക്കം നിലനിൽക്കുകയാണ്​. നിയമത്തിൽ ഇന്ത്യ ശക്തമായ എതിർപ്പു പ്രകടിപ്പിച്ചിരുന്നു. ഏകപക്ഷീയമായി ചൈന കൊണ്ടുവന്ന നിയമം നിലവിലുള്ള അതിർത്തി കരാറുകളെ ബാധിക്കുമെന്നായിരുന്നു ഇന്ത്യയുടെ ആശങ്ക.

ഇരുരാജ്യങ്ങളും തമ്മിലുള്ള ബന്ധത്തിന്​ വിള്ളലുണ്ടാക്കുന്നതാണ്​ നിയമമെന്നും ഇന്ത്യ കുറ്റപ്പെടുത്തിയിരുന്നു. ലഡാക്കിൽ ശക്തമായ സൈനിക നീക്കം നടത്തുന്ന ചൈന, തിബത്തിലെ ജനങ്ങളിൽനിന്ന്​ നിർബന്ധമായി ഭൂമി എഴുതിവാങ്ങുന്നതായും റിപ്പോർട്ടുണ്ടായിരുന്നു.

അതിർത്തി വിഷയങ്ങളിൽ ഇരുരാജ്യങ്ങളും ധാരണയിലെത്തിയിട്ടുമില്ല. ഇന്ത്യയുൾപ്പെടെ14 രാജ്യങ്ങളുമായി ചൈന 22,000 കി.മി അതിർത്തി പങ്കുവെക്കുന്നുണ്ട്​.