'ട്രംപും ബൈഡനും ജസീന്തയെയും ജൂഡിത്തിനെയും കണ്ടുപഠിക്കണം​'

ഒാക്​ലൻഡ്​: ചീത്തവിളികളും വ്യക്​തിപര ആക്രമണങ്ങളും നടത്തി അമേരിക്കൻ പ്രസിഡൻറ്​ തെരഞ്ഞെട​ുപ്പ്​ ചരിത്രത്തിലെ ഏറ്റവും മോശം ടെലിവിഷൻ സംവാദത്തിൽ ഏർപ്പെട്ട ഡോണൾഡ്​ ട്രംപിനും ജോ ബൈഡനും കണ്ടുപഠിക്കാനൊരു മാതൃക.

ഒക്​ടോബർ 17ന്​ നടക്കുന്ന ന്യൂസിലൻഡ്​​ തെരഞ്ഞെടുപ്പി​െൻറ ഭാഗമായി പ്രധാനമന്ത്രി ജസീന്ത ആർഡനും എതിർസ്ഥാനാർഥി ജൂഡിത്​ കോളിൻസും നടത്തിയ​ ടെലിവിഷൻ സംവാദമാണ്​ ട്രംപിനും ബൈഡനും മാതൃകയാകുന്നത്​.

ചിരിച്ചും പരസ്​പരം അഭിനന്ദിച്ചും തമാശപറഞ്ഞും രാജ്യം നേരിടുന്ന വിഷയങ്ങൾ ഉൗന്നിപ്പറഞ്ഞുമാണ്​ രണ്ട്​ സ്​ത്രീകളും സംവദിച്ചത്​. വ്യക്​തിപരമായ ആക്രമണങ്ങളോ എതിരാളിയെ തടസ്സപ്പെടുത്ത​േലാ ഒന്നുമില്ലാതെ തങ്ങൾക്ക്​ വോട്ടർമാരോട്​ പറയാനുള്ളത്​ ഇരുവരും ഉൗന്നിപ്പറഞ്ഞു.

ജസീന്തയും ജൂഡിത്തും കോവിഡ്​ ലോക്​ഡൗൺ അടക്കം വിഷയങ്ങളിൽ ശക്​തമായി തർക്കിച്ചത്​ പോലും മാന്യതയോടെയായിരുന്നു. താൻ മുമ്പ്​ കഞ്ചാവ്​ ഉപയോഗിച്ചിരുന്നതായി ജസീന്ത സമ്മതിക്കുകയും ചെയ്​തു. രണ്ടാമൂഴം തേടിയാണ്​ ലേബർ പാർട്ടി നേതാവ്​ ജസീന്ത വോട്ടർമാർക്കു മുന്നിലെത്തുന്നത്​.

മുൻ പൊലീസ്​ മന്ത്രിയായ ജൂഡിത്ത്​ നേതൃത്വംനൽകുന്ന നാഷനൽ പാർട്ടി തിരിച്ചുവരവ്​ പ്രതീക്ഷിക്കുന്നുണ്ട്​.