'ഗ്രെറ്റ ഇന്ത്യയിലെ കർഷകരെ പിന്തുണച്ച വിഷയമാണോ'..? ഒന്നും പറയാനില്ലെന്ന്​ സ്വീഡൻ

സ്​റ്റോക്​ഹോം: പ്രശസ്​തയായ​ സ്വീഡിഷ് കൗമാര​ കാലാവസ്ഥാ പ്രവർത്തക ഗ്രെറ്റ തുൻബർഗ്​ ഇന്ത്യയിലെ കർഷക പ്രക്ഷോഭത്തിന് പിന്തുണയറിയിച്ച്​ ട്വീറ്റിട്ടതോടെ സമരത്തിന്​ ആഗോള ശ്രദ്ധ കൈവന്നിരുന്നു. എന്നാൽ, ഇന്ത്യയിൽ നിന്ന്​ ഗ്രെറ്റയ്​ക്ക്​ ലഭിച്ചത്​ അത്ര സുഖകരമല്ലാത്ത മറുപടിയായിരുന്നു. ഡൽഹി പൊലീസ്​ 'ക്രിമിനൽ ഗൂഢാലോചന നടത്തിയെന്നും ശത്രുത വളർത്തുന്നുവെന്നും' ആരോപിച്ച് അവൾക്കെതിരെ​ കേസെടുത്തിരുന്നു. അതോടൊപ്പം കേന്ദ്ര സർക്കാർ, ഇന്ത്യയിലെ കായിക-കലാ രംഗത്തുള്ള സെലിബ്രിറ്റികളെ ഉപയോഗിച്ച്​ അതിനെ 'പ്രൊപ്പഗണ്ടയും' 'ആഭ്യന്തര കാര്യവുമാക്കി' സോഷ്യൽ മീഡിയയിലൂടെ പ്രതിരോധിക്കുകയും ചെയ്​തു.

അതേസമയം, സംഭവത്തിൽ ഗ്രെറ്റയുടെ രാജ്യമായ സ്വീഡ​െൻറ പ്രതികരണമറിയാൻ അന്താരാഷ്​ട്ര മാധ്യമമായ WION ഒരു ശ്രമം നടത്തി. ഇന്ത്യയിലെ കർഷക പ്രക്ഷോഭവുമായി ബന്ധപ്പെട്ട്​ ഗ്രെറ്റയിട്ട ട്വീറ്റിനെ കുറിച്ച്​ പ്രതികരണമറിയാനായി അവർ സമീപിച്ചത്​ സ്വീഡ​െൻറ വിദേശകാര്യ മന്ത്രാലയത്തെയായിരുന്നു. എന്നാൽ, 'ആ വിഷയത്തിൽ ഒന്നും പറയാനില്ലെന്നായിരുന്നു' മന്ത്രാലയത്തി​െൻറ മറുപടി.

ഒരു പൗരയെന്ന നിലക്ക്​ ഗ്രെറ്റയുടെ അഭിപ്രായങ്ങളും ട്വീറ്റുകളും വിദേശ നയത്തെ ബാധിക്കില്ല. പക്ഷെ, ഇൻഫ്ലുവൻസർ എന്ന നിലയിൽ അവർക്ക്​ പല കാര്യങ്ങളിലും സ്വാധീനം ചെലുത്താൻ കഴിഞ്ഞിട്ടുണ്ട്​. ആര്​ മറന്നാലും വൈറ്റ്​ ഹൗസിൽ നിന്നും പുറത്തുപോകേണ്ടിവന്ന ഡോണൾഡ്​ ട്രംപ്​​ ഒരിക്കലും ഗ്രെറ്റയെ മറക്കില്ല.

ഇന്ത്യ-സ്വീഡൻ ബന്ധത്തെ കുറിച്ച്​ പറയുകയാണെങ്കിൽ ഇരു രാജ്യങ്ങളും ഇതുവരെ ഏറ്റവും നല്ല ബന്ധമാണ്​ പുലർത്തുന്നത്​. ഇന്ത്യയുടെ പ്രധാനമന്ത്രി നരേന്ദ്ര മോദി 2018 ൽ സ്വീഡൻ സന്ദർശിച്ചിരുന്നു. അതോടെ കഴിഞ്ഞ 30 വർഷത്തിനുള്ളിൽ രാജ്യം സന്ദർശിച്ച ആദ്യത്തെ ഇന്ത്യൻ പ്രധാനമന്ത്രിയായി അദ്ദേഹം മാറുകയും ചെയ്​തു. ആ സന്ദർശന വേളയിൽ, ആദ്യത്തെ ഇന്ത്യ-നോർഡിക് ഉച്ചകോടിക്ക്​ സ്റ്റോക്ക്ഹോം ആതിഥേയത്വം വഹിക്കുകയും ചെയ്​തിരുന്നു.