പ്രസിഡൻറ്​ മാറി; നയം മാറുമെന്ന പ്രതീക്ഷയിൽ മെക്​സികോ

വാഷിങ്​ടൺ: യു.എസിൻെറ പുതിയ പ്രസിഡൻറായി ജോ ബൈഡൻ തെരഞ്ഞെടുക്കപ്പെടുമെന്ന്​ ഉറപ്പായിട്ടുണ്ട്​​. ഡോണൾഡ്​ ട്രംപിൻെറ നാല്​ വർഷത്തെ ഭരണത്തിന്​ ശേഷം ബൈഡൻ പ്രസിഡൻറായി എത്തുന്നത്​ പ്രതീക്ഷയോടെ ഉറ്റുനോക്കുന്ന രാജ്യങ്ങളിലൊന്നാണ്​ മെക്​സികോ. കഴിഞ്ഞ ട്രംപ്​ ഭരണകാലത്ത്​ വലിയ രീതിയിൽ ദുരിതമനുഭവിച്ച രാജ്യങ്ങളിലൊന്നായിരുന്നു മെക്​സികോ.

മെക്​സികോയിൽ നിന്നും എത്തുന്നവർ ബലാൽസംഘികളും തോക്ക്​ കൈയിൽ വെക്കുന്നവരുമാണെന്നും അവരെ മതിലുകെട്ടി തടയണമെന്നുമായിരുന്നു ട്രംപിൻെറ നിലപാട്​. മതിലു പണിക്കുള്ള പണത്തിൻെറ ഒരു വിഹിതം മെക്​സികോ നൽകണമെന്നും ട്രംപ്​ ആവശ്യപ്പെട്ടു.ബൈഡൻ നേതൃത്വസ്ഥാനത്തേക്ക്​ എത്തു​േമ്പാൾ ഈ നയത്തിൽ മാറ്റം വരുമെന്നാണ്​ മെക്​സികോ പ്രതീക്ഷിക്കുന്നത്​.

വ്യാപാരനയത്തിൻെറ പേരിലും മറ്റ്​ അജണ്ടകളിലും മെക്​സോ​കോയെ യു.എസ്​ ഉപദ്രവിക്കുന്നത് ബൈഡൻ അധികാരത്തിലെത്തുന്നതോടെ​ നിൽക്കുമെന്നാണ്​ പ്രതീക്ഷയെന്ന്​ മുൻ മെക്​സിക്കൻ ഡെപ്യൂട്ടി വിദേശകാര്യമന്ത്രി അൻഡ്രാസ്​ റോസെൻറൽ പറഞ്ഞു. ഇരു രാജ്യങ്ങളും തമ്മിലുളള ബന്ധം സാധാരണനിലയിലേക്ക്​ എത്തുമെന്നാണ്​ പ്രതീക്ഷയെന്ന്​ അദ്ദേഹം വ്യക്​തമാക്കി.

അതേസമയം, മെക്​സികോയിൽ നിന്നുള്ള കുടിയേറ്റക്കാരുടെ വൻ ഒഴുക്ക്​ ഉടനുണ്ടാവുന്നത്​ ബൈഡനും താൽപര്യമുണ്ടാവില്ലെന്നാണ്​ വിലയിരുത്തലുകൾ. അതുകൊണ്ട്​ മെക്​സികോ അവരുടെ തെക്കൻ അതിർത്തികൾ സുരക്ഷിതമാക്കി തന്നെ നില നിർത്തേണ്ടി വരും. എങ്കിലും ഡോണൾഡ്​ ട്രംപിൻെറ കടുംപിടുത്തം ബൈഡനുണ്ടാവില്ലെന്നാണ്​ തെരഞ്ഞെടുപ്പിന്​ ശേഷം​ പുറത്തുവരുന്ന വിലയിരുത്തലുകളിൽ നിന്നും വ്യക്​തമാകുന്നത്​.