പെന്‍റഗൺ പരിസരത്ത്​ സംഘർഷം; ഓഫീസർ​ കുത്തേറ്റുമരിച്ചു; ലോക്​ഡൗൺ ​പ്രഖ്യാപിച്ച്​ അധികൃതർ

വാഷിങ്​ടൺ: യു.എസ്​ ​പ്രതിരോധ ആസ്​ഥാനമായ പെന്‍റഗണിനോടു ചേർന്നുള്ള മെട്രോ സ്​റ്റേഷനിൽ കത്തിക്കുത്തും സംഘർഷവും. പൊലീസ്​ നടപടിയുടെ ഭാഗമായി പെന്‍റഗണിൽ ലോക്​ഡൗൺ പ്രഖ്യാപിച്ചു. വിർജീനിയയിലെ ആർലിങ്​ടൺ കൗണ്ടിയിൽ പെന്‍റഗൺ ട്രാൻസിറ്റ്​ സെന്‍ററിൽ ചൊവ്വാഴ്ച രാവിലെ 10.30 ഓടെ ഓഫീസറെ ഒരാൾ കത്തികൊണ്ട്​ കുത്തുകയായിരുന്നു. ജോർജിയ സ്വദേശി 27കാരനായ ഓസ്റ്റിൻ വില്യം ലാൻസ്​ ആണ്​ പ്രതി. ഓഫീസർക്കുനേരെ പാഞ്ഞെടുത്ത ഇയാൾ കഴുത്തിൽ കുത്തുകയായിരുന്നു. ഉടൻ പാഞ്ഞടുത്ത സുരക്ഷാ ഉദ്യോഗസ്​ഥർ ഇയാളെ വെടിവെച്ചുകൊന്നു. പരിസരത്തുണ്ടായിരുന്ന രണ്ടു പേർക്ക്​ പരിക്കേറ്റതായും റിപ്പോർട്ടുകൾ പറയുന്നു. ആക്രമണ കാരണം അന്വേഷിച്ചുവരികയാണ്​.

പൊലീസ്​ നടപടികൾ പൂർത്തിയാക്കുന്നതിന്​ പെന്‍റഗണിൽ ചൊവ്വാഴ്ച അധികൃതർ ലോക്​ഡൗൺ നടപ്പാക്കി. ഉച്ചക്കുശേഷം പിന്നീട്​ പിൻവലിച്ചു.

നേരത്തെ യു.എസ്​ മറൈൻ കോർപ്​സിൽ നിയമനം ലഭിച്ചയാളാണ്​ അക്രമിയായ യുവാവ്​. ഒരു മാസത്തിനകം പുറത്താക്കിയതായും റിപ്പോർട്ടുകൾ പറയുന്നു. കവർച്ച, പൊലീസിനു നേരെ അതിക്രമം ഉൾപെടെ കേസുകളിൽ നേരത്തെ പ്രതിയാണ്​.

തിരക്കേറിയ മെട്രോ പാതയിലെ ആക്രമണം മണിക്കൂറുകളോളം ഗതാഗതക്കുരുക്ക്​ രൂക്ഷമാക്കി.

ആക്രമണ സമയത്ത്​ ജോയിന്‍റ്​ ചീഫ്​ ഓഫ്​ സ്റ്റാഫുമാരുൾപെടെ വൈറ്റ്​ഹൗസിൽ ജോ ബൈഡനുമായി കൂടിക്കാഴ്ചക്കെത്തിയതായിരുന്നു.