ജർമനിയിൽ ഒലഫ്​ ​ഷുൾസിന്​ സാധ്യത; മന്ത്രിസഭയുണ്ടാക്കാൻ തിരക്കിട്ട ചർച്ചകൾ

ബെർലിൻ: ആർക്കും മേൽക്കൈ നൽകാതെ പൊതു തെരഞ്ഞെടുപ്പ്​ ഫലം പൂർത്തിയായ ജർമനിയിൽ മ​ന്ത്രിസഭ രൂപവത്​കരണത്തിന്​ ശ്രമങ്ങൾ ആരംഭിച്ച്​ കക്ഷികൾ. നേരിയ മുൻതൂക്കം ലഭിച്ച സോഷ്യൽ ഡെമോക്രാറ്റ്​ നേതാവ്​ ഒലഫ്​ ഷുൾസി​‍െൻറ നേതൃത്വത്തിൽ സർക്കാറുണ്ടാക്കുമെന്നാണ്​ പ്രാഥമിക സൂചനകൾ. നിലവിലെ ചാൻസലർ​ അംഗല മെർകൽ അധികാരം വിട്ട രാജ്യത്ത്​ അവരുടെ കക്ഷിയായ ക്രിസ്​ത്യൻ ​ഡെമോക്രാറ്റുകൾ ഇത്തവണ രണ്ടാം സ്ഥാനത്താണ്​.

ഇതര കക്ഷികളായ ഗ്രീൻ പാർട്ടിയുമായും ഫ്രീ ഡെമോക്രാറ്റുകളുമായും അടുത്ത ദിവസം ചർച്ച ആരംഭിക്കുമെന്ന്​ ഒലഫ്​ ഷുൾസ്​ വ്യക്തമാക്കി. എന്നാൽ, പരസ്​പരം ചർച്ച പൂർത്തിയാക്കിയ ശേഷമേ സോഷ്യൽ ഡെമോക്രാറ്റുകളുമായി സർക്കാർ രൂപവത്​കരണശ്രമം നടത്തൂ എന്നാണ്​ ഇരുകക്ഷികളുടെയും നിലപാട്​. ​അംഗല ​െമർകലി‍െൻറ പിൻഗാമികൾക്ക്​ നേരിയ സാധ്യതകൾ ഉണ്ടെങ്കിലും ഷുൾസ്​ തന്നെ ഭരണമേറുമെന്ന്​ മറ്റു കക്ഷികളും കണക്കുകൂട്ടുന്നു.

2005 മുതൽ രാജ്യത്ത്​ ചാൻസ​ലറായി തുടരുന്ന മെർകൽ ഇനി തുടരാനില്ലെന്ന്​ നേരത്തെ പ്രഖ്യാപിച്ചിരുന്നു. പിൻഗാമിയായി അർമിൻ ലാഷെറ്റിനെ തെരഞ്ഞെടുക്കുകയും ചെയ്​തു. തെരഞ്ഞെടുപ്പിൽ ദയനീയ പ്രകടനത്തോടെ ഭരണമേറാനുള്ള സാധ്യതകൾ ഏകദേശം അസ്​തമിക്കുകയായിരുന്നു. കഴിഞ്ഞ ദിവസം നടന്ന അഭിപ്രായ സർവേയിൽ 62 ശതമാനം പേരും ഷുൾസ്​ ചാൻസ​ലറാകണമെന്ന പക്ഷക്കാരാണ്​. പുതിയ ചാൻസ​ലറെ കണ്ടെത്തുംവരെ മെർകൽ പദവിയിൽ തുടരും.

ജർമനിയിലെ ഏറ്റവും പ്രായമുള്ള രാഷ്​ട്രീയ കക്ഷിയായ സോഷ്യൽ ഡെമോക്രാറ്റുകൾ 25.7 ശതമാനം വോട്ടു നേടിയപ്പോൾ ക്രിസ്​ത്യൻ ഡെമോക്രാറ്റുകൾ 24.1 ശതമാനത്തിലൊതുങ്ങി. ഗ്രീൻസ്​ 14.8 ശതമാനവും എഫ്​.ഡി.പി 11.5 ശതമാനവും സ്വന്തമാക്കി നിർണായക കക്ഷികളായി. ഇവയുടെ നേതാക്കളായ അത്​ലറ്റ്​ അനാലിന ബീർബോക്​, നോവലിസ്​റ്റ്​​ റോബർട്ട്​ ഹാബെക്​, വ്യവസായി ക്രിസ്​ത്യൻ ലിൻഡ്​നർ എന്നിവരാകും വരും നാളുകളിലെ ചർച്ചകളിൽ നിറയുക.