ഫലസ്​തീനിൽ​ 15 വർഷത്തിനു ശേഷം തെരഞ്ഞെടുപ്പ്​; പാർലമെന്‍റ്​, പ്രസിഡന്‍റ്​ തെരഞ്ഞെടുപ്പ്​ വർഷാവസാനം

റാമല്ല: ഫലസ്​തീനിൽ ഒന്നര പതിറ്റാണ്ടിന്‍റെ ഇടവേളക്കു ശേഷം തെരഞ്ഞെടുപ്പ്​ വരുന്നു. പാർല​െമന്‍ററി, പ്രസിഡന്‍റ്​ തെരഞ്ഞെടുപ്പുകൾ വർഷാവസാനം നടക്കുമെന്ന്​ പ്രസിഡന്‍റ്​ മഹ്​മൂദ്​ അബ്ബാസ്​ അറിയിച്ചു. 2006ൽ അവസാനമായി നടന്ന തെര​െഞ്ഞടുപ്പിൽ ഹമാസ്​ വൻഭൂരിപക്ഷത്തോടെ വിജയിച്ചിരുന്നു.

മഹ്​മൂദ്​ അബ്ബാസിന്‍റെ ഫത്​ഹ്​ പാർട്ടിക്ക്​ വലിയ വെല്ലുവിളി ഉയർത്തുന്നതാകും തെരഞ്ഞെടുപ്പ്​. ഇസ്രായേൽ അധിനിവേശത്തിൽനിന്ന്​ മോചനത്തിന്​ ശ്രമം നടത്തുന്നതിലും ഫലസ്​തീന്​ സ്വാതന്ത്ര്യം ഉറപ്പാക്കുന്നതിലും ഇതുവരെയും പ്രസിഡന്‍റ്​ എന്ന നിലയിൽ മഹ്​മൂദ്​ അബ്ബാസ്​ വൻ പരാജയമായിരുന്നു.

മറുവശത്ത്​, ഇസ്രായേൽ കടുത്ത ഉപരോധം നടപ്പാക്കിയിട്ടും ഗസ്സയിൽ 2007 മുതൽ ഭരണം തുടരുന്നത്​ ഹമാസാണ്​. ഉപരോധം ജനജീവിതം നരകതുല്യമാക്കിയിട്ടും ഇവിടെ പാർട്ടിക്കു തന്നെയാണ്​ ഇപ്പോഴും ജനപ്രീതി.

പുതിയ ഉത്തരവു പ്രകാരം നിയമനിർമാണ സഭകളിലേക്ക്​ തെരഞ്ഞെടുപ്പ്​ മേയ്​ 22ന്​ നടക്കും. പ്രസിഡന്‍റ്​ തെരഞ്ഞെടുപ്പ്​ ജൂ​ൈല 31നുമാകും. ഫലസ്​തീനികളെ രാജ്യാന്തര തലത്തിൽ ​പ്രതിനിധാനം ചെയ്യുന്ന ഫലസ്​തീൻ ലിബറേഷൻ ഓർഗനൈസേഷൻ ദേശീയ കൗൺസിൽ തെരഞ്ഞെടുപ്പ്​ ഒരു മാ​സം കഴിഞ്ഞ്​ ആഗസ്റ്റ്​ 31നാണ്​ നിശ്​ചയിച്ചിട്ടുള്ളത്​.

അമേരിക്ക ഉൾപെടെ തീവ്രവാദമാരോപിക്കുന്ന ഹമാസിനെ പടിക്കുപുറത്ത്​ നിർത്താൻ ഒളിഞ്ഞും തെളിഞ്ഞും ശ്രമം നടക്കുന്നതിനിടെ വരുന്ന തെരഞ്ഞെടുപ്പ്​ പ്രഹസനമാകുമെന്ന ആശങ്കയും നിലനിൽക്കുന്നുവെങ്കിലും പ്രഖ്യാപനം ഹമാസ്​ സ്വാഗതം ചെയ്​തിട്ടുണ്ട്​.

2006ലെ തെരഞ്ഞെടുപ്പിന്​ ശേഷം ഹമാസ്​ ഭരണം ലഭിക്കാനും ഫതഹ്​ അധികാരം നഷ്​ടപ്പെടാതിരിക്കാനും നടത്തിയ ശ്രമങ്ങൾ ഫലസ്​തീനിൽ ഭരണ പ്രതിസന്ധി സൃഷ്​ടിച്ചിരുന്നു. ഇതിന്‍റെ തുടർച്ചയായാണ്​ ഒരു വർഷം കഴിഞ്ഞ്​ ഗസ്സയിൽ ഹമാസ്​ അധികാരമേറ്റെടുത്തത്​. അതോടെ, ഉപരോധം നടപ്പാക്കിയ ഇസ്രായേൽ മൂന്നുതവണ ആക്രമണവും നടത്തി.